КЫЕН КОӴЫШЕН

Сӥзьыл куазен одӥг адями нюлэсканы потэм. Ветлон сяменыз шутэтскыны пуксем но пурты быдӟа пукись вуэз адӟем. Султыса, ву доры мынэм но, отын кый сэрпалляське, пе. Куазь кезьыт луыны кутскемен кыйлэн быжыз кынмем. Адямиез адӟем но адями кылын вераськыны кутскем:

— Адями уром! Монэ татысь потты вал. Мон татчы бырисько ини.

Адями жалям но кыез поттоно кариськем. Кус пулсысьтыз тӥрзэ басьтыса, йӧзэ ури-бери корам, кыез поттэм.

— Укыр кынмисько, пияд поныса, ӧжыт шунты на вал, туж тау карысал, — шуэм кый нош ик.

— Кызьы-о карод, кынмем муртэз шунтод ке, шунтод ини.

Кыез кутэм но пияз понэм. Кема ик улымтэ, адямилэн пияз кый шунам. Улэп кылем понназ, тау карем интые, адямиез сиыны малпам.

— Адями уром! Мон тонэ сио ини.

Кыйлэсь сыӵе «ӟеч» кылзэ кылыса, адями мар карыны ик паймем.

— Сиемед потэ ке, сиод ини, мар карод на. Только сиемедлэсь азьло пумитамы сюрем куинь муртлэсь юалом. Соос мар шуозы. Собере адӟом ини, — шуэм адями.

Та верамлы кый кылзӥськем. Номыр куаретытэк, сюрес кузя кошкиллям. Кӧня ке мыныса, кыдёке ик вуиллямтэ, пумитазы вал сюрем.

— Чырткем-а, вал! — шуэм кый.

— Умой! — шуэм вал.

— Вера али, мон та адямиез сиом-а, ум-а?

— Сое сиыны кулэ, си. Ярам коть, ки улад сюрем, улэпкын эн кельты. Со монэ гид азбар шораз ӟег куро вылын возе, ӟеч сионэз мыным ноку но уг возьматъя. Нюлэскы ке мыноно, аслэсьтым ӝужыт пу тыре. Со пу вылэ ачиз пуксе. Нуыны ке уг вормиськы, монэ ик жуге.

— Сио ке, сио ини, вал но сиыны косэ, — шуэм кый.

— Дугды али, вал косэ ке, косэ но, солэн косэменыз уз тырмы на, азьланьысь кык муртлэсь юалом на, — шуэм адями.

Кый номыр шуымтэ ни, нош тупам. Кошкиллям азьлане. Кӧня ке мыныса, скалэн пумиськиллям.

— Чырткем-а, скал! — адямилэн пиысьтыз йырзэ поттыса, шуэм кый.

— Умой! — шуэм скал.

— Вера али, мон та адямиез сиом-а, ум-а?

— Си, си, сое сиыны кулэ. Со мынэсьтым йӧлме сиыса улэ, асме ӟег куро вылын возе. Кунянэ ке вордске, йӧлме, кунянэлы кельтытэк, ваньзэ ачиз сиыса быдтэ.

— Кык мурт косӥз сиыны, табере сио ке, сио ини.

— Дугды али, одӥг муртлэсь юалом на, соиз мар шуоз, — шуэм адями.

Кый номыр верамтэ. Нош азьлань кошкиллям.

Трос-а, ӧжыт-а, кыдёке-а, матэ-а таос мынӥллям, ӝужыт бадьпу пӧлысь коӵышез адӟиллям. Тае адӟыса, кый туж шумпотэм. «Табере сио ини», малпа со. Адямилэн пиысьтыз йырзэ кузь поттыса, коӵышлы вазиське:

— Чырткем-а, коӵыш уром!

Коӵыш, синзэ кыньыртыса, йырзэ уллань лэзьыса, пумитаз вазем:

— М-ма? Матэгем кариськыса вера. Уг валаськы, пересьми ини, пельы секыт луиз.

— Та адямиез сиом-а шуыса юасько, — туж зол кеськем кый.

— М-ма? — шуэм нош ик коӵыш, — матэгес кариськы, уг валаськы, олома вераськод, пельы туж секыт.

Коӵыш, гижыоссэ кузь поттыса, бадьпу йылысь кыйлэн йыр вылаз тэтчем но куаж-куаж карыса вием.

— Тон адямиез сиыны ӧдъяськод. Сёто мон тыныд сое сиыны. Ӟеч куноез ке лыктэ, нырысь ик ческыт пӧрам сионзэ мыным веръятэ. Тӧро сэрегысь миндэр вылаз мон пукисько. Толалтэ кезьыт куазен шуныт гур вылэз солэн быдэсак мыным сётэмын. Тани, си на табере...

Адями коӵышез бадьпу йылысь басьтэм но, пельпумаз пуктыса, куное нуэм. Озьы коӵыш адямиез кулонлэсь мозмытэм.