СКРИПКАЧИ НО ЭШЪЁСЫЗ

Улэм-вылэм одӥг скрипкачи. Со мурт, скрипкаен туж усто ке но шудэ вылэм, куанер улэм, коркаез туж алама, куашкано кадь гинэ вылэм. — Эх, татын курадӟыса улытозь, выль музъеме кошконо! — шуэм скрипкачи.

Скрипказэ кунулаз басьтыса, выль музъеме потэм. Сюрестӥ мынэм, мынэм, туж кыдёке вуэм; пумитаз кион ӝимем.

— Кытчы мынӥськод, адями уром? — юам кион.

— Выль музъеме мынӥсько, — шуэм скрипкачи.

— Мон но мыно, — сьӧраз куриськем кион.

— Ойдо, ойдо, — шуэм скрипкачи.

Кошкиллям таос кыкназы. Мыно, мыно, пе, — пумитазы гондыр шедем ио, — кытчы мынӥськоды? — шуэм.

— Выль музъеме мынӥськом, — шуиллям.

— Мон но мыно, — куриськем гондыр.

— Ойдо, — шуиллям скрипкачиен кион.

Куиньназы кошкиллям. Мыно, мыно но, ветыл соослы учырам.

— Кытчы мынӥськоды, адями уром, кион уром, гондыр уром?

— Выль музъеме.

— Мон но мыно.

— Ойдо, ойдо, — шуиллям таос.

Собере кошкиллям ньыльназы.

Мынӥллям, мынӥллям но одӥг интые дугдӥллям. Собере таос корка пуктыны малпало ини. Адями, гондыр, ветыл лэзизы, пе, кионзэс шунды ӝужан пала инты учкыны.

Кошкем кион; инты утчам, утчам но шедьтымтэ, копак нюр но мар гинэ.

— Шедьтӥд-а? — шуиллям гондыр, адями но ветыл.

— Ӧй, — шуэм кион, — копак нюр но мар гинэ.

Собере гондырзэс уй пала лэзиллям. Соиз нош ик ветлэм, ветлэм, номыр шедьтымтэ. Уромъёсыз доры бертэм.

— Шедьтӥд-а? — юаллям таос.

— Ӧй, — шуэм гондыр, — копак нюр но мар.

Собере лэзиллям соос ветылэз. Ветыл кошкиз, пе, но умой инты ӧз шедьты, копак нюр но мар гинэ.

— Эй, — шуэм адями, — тӥ ӧд шедьтэ, ачим кошкисько.

Кошкем та лымшор пала. Кыдёке ик мынымтэ, туж умой инты шедьтэм: ошмесэз но отын ик, корка пуктыны но ӵошкыт. Кионэз, ветылэз, гондырез доры бертэм.

— Шедьтӥд-а? — шуыса юало, пе, соос.

— Шедьтӥ, ойдолэ мыноме, — шуэм адями.

Мынэм беразы ик мур гу гудыны кутскиллям, со вылэ корка пуктӥллям но уло, пе, ини.

— Эй! — шуиллям таос, — выль музъеме лыктэм бере сур пӧзьтыса юоно.

Шуиллям но одӥг бекче сур пӧзьтӥллям, сое гулбечазы ватӥллям.

Ӝыт луэм бере сурез возьманы кионэз поттӥзы, пе. Уйшор вакыт со доры пересь кышно лыктэм.

— Кион уром, вай сурдэ юом, — шуэм пересь кышно.

— Какой али тыныд сур, асьмеос но ӧм юэ на, — шуэм кион.

Собере пересь кышномуртлэн вожез потэм но кионэз жугем; кион корка пырем но шонерак гур вылаз тубыса выдэм.

— Малы пырид али ик? — шуиллям адями, гондыр но ветыл солы.

— Туж кезьыт, кынмиськиз, — шуэм кион.

Чукна потӥллям но, сурзы чик ӧвӧл ни. Ӧвӧлысьтыз нош ик пӧзьтӥллям но нош ик гулбечазы понӥллям. Ӝыт луэм бере гондырез поттӥллям возьманы. Уйшор вакыт потӥз, пе, пересь кышно, гондырлэсь сурзэ куре, пе.

— Какой тыныд сур! — шуэм гондыр. — Асьмеос но ӧм юэ на али.

Нош ик пересь кышнолэн вожез потэм, жугем-жугем но гондырез уллям. Ачиз нош вань сурзэ юыса быдтэм. Гондыр корка пырем, шонерак гур вылэ тубем.

— Малы али ик пырид? — юаллям соосыз.

— Кынмисько, — шуэм, — куазь кезьыт.

Чукна потӥллям но, сурзы чик ӧвӧл ни. Нош ик пӧзьтӥллям но гулбечазы понӥллям. Ӝыт луэм бере ветылэз поттӥллям сур возьманы.

Уйшор вакыт со пересь кышно нош ик лыктэм, зарни бодыен но зарни колошаен со.

— Ветыл уром, вай сурдэ, — шуэм пересь кышно.

— Какой тыныд сур! Куиньметӥзэ сур пӧзьтӥм ини, асьмеос но ӧм юэ на али, — шуэм.

Нош ик та пересь кышно зарни бодыеныз ветылэз жугиз-жугиз, пе, но сурзэ юиз, быдтӥз.

Ветыл жум кошкем, гур вылэ тубем.

— Малы пырид али ик? — юаллям соосыз.

— Кезьыт, кынмиськиз, — шуэм ветыл.

Чукна потӥллям но, сурзы ӧвӧл ни. Собере нош ик пӧзьтӥллям но гулбечазы пуктӥллям.

Ӝыт луэм бере адями скрипкаеныз ачиз потэм но шудыны кутскем. Уйшор дыръя со пересь кышно нош ик лыктэм.

— Вай сурдэ, адями уром, — шуэм.

— Юом, юом, — шуыса скрипкачи тусьтыен сурзэ сётэм.

Одӥг тусьтызэ юыса быдтэм пересь кышно. Скрипкачи нош ик сётэм. Пересь кышно юыса кудӟиз но эктыны кутскиз. Адями нош скрипкаеныз, пе, шудэ. Собере нош ик сурен сектам. Пересь кышно кудӟем, эктыны но уг ни быгаты, выдӥз, пе, но изиз. Адями каллен гинэ басьтэм со кышнолэсь зарни колошаоссэ но бодызэ, йырситӥз позыртэм но жугыны кутскем. Жуге-жуге, нош пересь кышно черекъя, пе:

— Эн жуг, эн жуг! Чебер ныл вайыса сёто мон тыныд.

Собере адями дугдэм. Пересь кышно адямилы ныл ваиз но ачиз кошкиз, пе; колошаен бодызэ нош кельтэм.

Адями со нылыныз пырем но верам эшъёсызлы:

— Тани мон ныл шедьтӥ.

Эшъёсыз таласькыны кутскиллям:

— Мыным ныл, мыным ныл, — шуо, пе.

— Коркась муртэз кышкатыны кин ке быгатӥз ке, ныл солы луоз, — шуэм адями.

Собере кион потэм кышкатыны. Вузэ, ӧсэз ӵабъя, пе. Пырем но юам:

— Кышкады-а?

— Чик ӧм кышкалэ, — шуиллям соосыз.

Собере гондыр потэм но кион кадь ик кышкатэ, пе. Берен пырем но, — кышкады-а, — шуыса юам.

— Ӧм кышкалэ, — шуиллям таосыз.

Собере потэм ветыл, кутскем кышкатыны. Коркаез ӝутъя, сильтӧл, пе, поттэ. Пырем бераз, — кышкады-а? — шуэм.

— Ӧм, — шуо, пе, таосыз.

Асьсэос кышкаллям но юри вераллямтэ (ветыл — чорт вылэм).

Собере адями потэм. Гулбечысьтыз колошаен бодызэ басьтэм но, ӧсэз пичи гинэ усьтыса, со бодыен колошазэ донгем. Соос, пересь кышно лыктэм шуыса, туж кышкаллям. Кышкаменызы, кион но гондыр укноетӥ тэтчыса кошкиллям, бызьыса, бызьыса жадеменызы кулӥллям. Ветылзы вӧлдэтэз ӝутыса потэм. Ныл нош огназ кылем. Адями пырем но нылэз аслыз кузпал карем. Соос али ке но уло выль музъемын.