ПЕЛЁ

Вашкала дыръя одӥг нюлэскын син сузёнтэм ӝужыт пужым вылэм. Со пужымлэн йылаз ик пелё, кар лэсьтыса, пи поттэм. Пелёлэн пиосыз куать вылэм.

Нюлэскытӥ шыраса ветлон сямен пелёлэсь карзэ ӟичы адӟем. Ымдуръёссэ нюлыса, пелё кар шоры учкыса, ӟичы пужым котыртӥ берга, пе.

Пелёлы вазем:

— Пелё уром! Пелё уром! Одӥг ке но пидэ сёт али! Ӧд ке сёт, тубыса но сио, кораса но сио. Тубоно ке — киы вань, корано ке — тӥре вань.

Пужым йылысь пелё кышкаменыз шулӟектэм, дыр-р куалекъяны кутскем. Мар карыны ёрмем. Зар-зар бӧрдыса пуке, пе.

Тубыса сиемезлэсь кышкаса, пелё одӥг пизэ ӟичылы музэ куштӥз, пе. Ӟичы, пелёпиез басьтыса, палэнэ кошкыса, сием но гурезь бамалэ шундыя ял карыны зоньтӥськем.

Ӟичы гурезь бамын кема-а, ӧжыт-а кыллем — тодӥсь ӧвӧл. Кайта нуналаз нош сиемез потыны кутскем.

Пелёпи ческыт потэм, лэся: ӟичы нош ик бадӟым пужым улэ вуиз, пе. Пелё, сое адӟыса, кужмо бӧрдыны кутскем. Бӧрдэ, тэльмыре:

— Ӟичы уром, пожалуйста, пиосме эн си ни вал. Аслам но куать гинэ вал.

Ӟичы солэн пумитаз верам:

— Пелё уром! Пелё уром! Нош ик одӥг ке но пидэ сёт али!

Ӧд ке сёт, тубыса но сио, кораса но сио. Тубоно ке — киы вань, корано ке — тӥре вань.

Пелё кышкаменыз нош ик одӥг пизэ карысьтыз куштӥз, пе. Ӟичы ымаз суп-сап куртчыса кошкем. Пелё нош азьлолэсь но тужгес бӧрдыса кылем. Ӟичы, Туймы дурысь возь вылын кӧт пыдэс вылаз выдыса, азь пыдъёсыныз кутыса, пелёпиез кесяз, пе. Сием бераз ымдуръёссэ нюлыса, Туймы дуре мисьтаськыны кошкем.

Пелё нош пужым йылаз, пиоссэ жаляса, уен-нуналэн бӧрдэ, пе.

Куинетӥ нуналаз ӵукна ик бӧрдыса пукись пелё доры, пужым йылэ, пересь дыдык пуксем. Пужымен артэ сылӥсь кондовой тыпы улэ ӟичы но вуэм. Ӟичы, номыр куаретытэк, тыпы выжыын, пелёен дыдык шоры учкыса, шып пуке, пе.

— Малы сыӵе чигиськыса бӧрдӥськод, пелё уром? — пересь дыдык пелёлэсь юам.

— Кызьы уд бӧрды: ӟичы кык пиме нуиз ини. «Ӧд ке сёт, тубыса но сио, кораса но сио», — шуэ. Тубиз ке, со огмес но уз кельты, ваньмес сиоз; кораса пужыммес ке погыртӥз, ваньмес сием гинэ ӧвӧл, коркаме но кесяса куштоз.

— Эй, визьтэм, визьтэм! Мар кышканэз ини со ӟичылэсь?

Ӟичы тыпы выжыын дыдыклэсь вераськемзэ кылзӥськыса пуке, пельзэ сак возе.

— Солэн пужым йылэ тубоно ке, киыз ӧвӧл. Юнме сётэмед тон солы пиостэ. Табере эн сёт ни, — валэктэм пелёез дыдык.

Ӟичылэн сюлэм писыръя, пе. Дыдыклы вожез потэмен ӵыжектэм со. Синъёс ӝуало, пе.

— Сюрод ачид но, — ас понназ малпам ӟичы.

Дыдык пелёез дышетэм но гултыртыса пужым йылысь лобӟем. Пелё, мырдэм буйгатскыса, бӧрдэмысь дугдэм.

Ӟичы тыпы улысь каллен гинэ султӥз но пужым пала вамыштӥз, пе. Пужым улэ вуыса, небыт быж вылаз пуксем. Йырзэ выллань урдыса, пелё шоры вазем:

— Пелё уром! Пелё уром! Одӥг ке но пидэ сёт али. Ӧд ке сёт, тубыса но сио, кораса но сио.

— Тырмоз ини, уно ӧрекчад. Тынад, тубоно ке, киыд ӧвӧл, корано ке, тӥред ӧвӧл, — ӟичы пумитэ пелё вазем.

— А-а, дыдык уромед дышетӥз-а ма? Сюроз али ачиз но!

Ӟичы, йырзэ ошыса, гурезь уллань Туймы ӧр пала шунь-шунь кошкиз, пе.

Пелё, пиосызлы шумпотыса, пужым йылэ караз кылем. Пиоссэ сюдэ-вордэ, утялтэ.

Ӟичы гурезь баме, возь кыре, вуэм но зоньтӥськыса выдэм. Кулэм амал кариськем. Кема-а, ӧжыт-а кыллем — тодмо ӧвӧл.

Лобаса ветлӥсь пересь дыдык кулэм ӟичыез адӟем.

— Гултыр-р! гултыр! — кесяськыса, гурезь баме ӟичылы матэ пуксем. Со сьӧры пинал дыдыкъёс но пуксиллям.

— Гултыр-р! гултыр-р! — кесяськыса, ӟичы котыртӥ тэтчаса, пе, ветло.

— Гултыр-р! гултыр! Синзэ меда кокчалтом, быжзэ меда кокчалтом? — Дыдык пумен ӟичылы матэ лыктэ, пе, ӟичы котыртӥ тэтчаса ветлэ.

— Гултыр-р! гултыр! Синзэ меда кокчалтом? Быжзэ меда кокчалтом? Вай синзэ кокчалто, — шуыса, дыдык ӟичылэн йыр палаз тэтчем.

Йырзэ вылэ-э ӝутыса, ӟичылэсь синзэ кокчалтыны ӧдъя вал но, ӟичы, зурак тэтчыса, дыдыкез кырмем. Пинал дыдыкъёс кышкаса, лыпыр-лопыр лобӟиллям. Анайзэс жаляса, вылын кесяськыса лобало, пе.

— А-а, ачид но сюрид-а? Пелё уромдэ туж дышетӥськод вал, — ӟичы дыдыклэн кылзэ юа, пе.

— Ӟичы уром, пожалуйста, улэпкын эн си вал! — пересь дыдык сюлворыны кутскем. — Сиод ке но, нырысь ик, куинь тылытӥм кутыса, музэ шуккыса ви, собере си.

Визьтэм ӟичы солэсь кылзӥськем. Куинь тылытӥз кутэм но дыдыкез вылэ-э ӝутэм. Вай-вай бералскыса, музъем борды шукке вылэм но, дыдыклэн куинь тылыез ӟичы ыме ишкалскыса кылем. Дыдык лобӟем но кошкем.

— Гултыр-р! гултыр-р! Ӟичыез дыдык пӧяз-а?.. Ӟичыез дыдык пӧяз-а? Гултыр-р!.. Ӟичыез дыдык пӧяз-а? — дыдык ӟичы котыртӥ лобаса ветлэ, пе.

Ӟичы йырыз курен олокытчы кошкем.

Дыдык озьы кескич ӟичыез пӧям, пелёлэсь пиоссэ улэп кельтэм. Со дырысь пелёен дыдыкъёс уромъяськыса уло, огзы доры огзы куное ветло, табань сио, мусур юо, огзэс огзы куно каро.