КОТОФЕЙ ИВАНЫЧ

Одӥг бай муртлэн туж визьмо Котофей Иваныч нимо коӵышез вылэм. Огпол кузё ӝук пӧзьтэм но сое гур азяз пуктэм, шобыртымтэ. Котофей Иваныч сое, отысь шедьтыса, сиыны кутскем. Кузё тае адӟем но Котофей Иванычез куктӥз кутыса жугем. Жугем-жугем но, итымаз нуыса, кабан улэ куштэм. Котофей Иваныч отын бӧрдыса, пе, кылле. Отчы луд кеч вуэм.

— Котофей Иваныч, малы бӧрдӥськод? — шуыса юам.

— Кузё жугыса куштӥз но, бӧрдӥсько, — ӝожкем коӵыш.

— Тазьы бӧрдыса улытозь, вай нюръяськомы, кин кинэ вормоз.

Котофей Иваныч «вай ке, вай» шуыса кутскем. Луд кечлэсь бамзэ ӵабтыса басьтэм. Эк, бен луд кеч кукъёсыз ик чигымон бызьыса, бӧрдыса кошкем.

Солэн пумитаз ӟичы потэм. Ӟичы шуэм:

— Луд кеч уром, малы бӧрдӥськод?

— Котофей Иванычен нюръяськиськом вал но, жугыса лэзиз.

— Мон сое быжыным шукки ке, отчыяз ик визьтэммытыса кельто, — шуыса, ӟичы ворттыса ик кошкем.

Ӟичы вуэм коӵыш доры но, Котофей Иваныч бӧрдыса, пе, улэ.

— Котофей Иваныч, малы бӧрдыса кыллиськод али?

— Кузё жугыса куштӥз но, соин бӧрдӥсько.

— Бӧрдыса кылльытозь, вай нюръяськом.

— Вай ке, вай, нюръяськом, — шуэм Котофей Иваныч.

Ӟичы быжыныз шукке вылэм но, Котофей Иваныч копак быжзэ ишкалтыса кельтэм. Ӟичы нош кукыз чигымон ик ворттыса кошкем. Озьы ворттон сяменыз кионэн пумиськем.

— Ӟичы уром, ма бӧрдӥськод? — юам кион.

— Котофей Иванычен нюръяськиськом вал но, быжме ишкалтӥз.

— Ок, мон сое, — шуыса, кион ворттыса кошкем.

Кион Котофей Иваныч доры вуэм но вера, пе:

— Мар бӧрдыса кыллиськод? Бӧрдыса кылльытозь, вай нюръяськом: кин кинэ вормоз.

— Вай ке, вай, — шуыса, Котофей Иваныч кутскем.

Кион, пе, малпаське ас понназ: «Талэн синмыз адӟе меда, уг меда». Озьы малпаськыса, Котофей Иванычлэн синмаз гижызэ донге вылэм. Котофей Иваныч, куаляк усьыса, кионлэн бамаз кырмиськем, бамзэ копак кесьыса басьтэм.

Кион зар бӧрдыса кошке, пе, ини. Солэн пумитаз чумолё быдӟа гондыр шедем.

— Малы бӧрдӥськод, кион уром?

— Котофей Иванычен нюръяським но, жугыса лэзиз.

— У-ук, мон сое! — шуыса, гондыр лоп-лоп бызьыса кошкем.

Котофей Иваныч кабан улын бӧрдыса кылле вылэм.

— Ма бӧрдӥськод? Бӧрдыса кылльытозь, вай нюръяськом.

— Вай ке, вай, нюръяськом, — шуэм коӵыш.

Гондыр малпаське: «Тае мыжгом-а меда... Мыжги ке, кулоз, дыр... Чапко гинэ али». Котофей Иваныч солэсь ымнырзэ кырмем но кесьыса басьтэм. Эк, бӧрдыса, пе, кошке гондыр!

Луд кеч, ӟичы, кион но гондыр огазе луиллям но кенешо, пе, ини:

— Со асьмемыз ваньмес виылоз ведь, — луд кеч шуэм.

— Вай асьмеос сое куное ӧтём, — ӟичы шуэм.

Озьы кенешиллям но, гондыр кошкем скал вайыны, кион — ыж вайыны, ӟичы — ӟазег вайыны. Ваиллям таос, кинлы ма кулэ вал, ваиллям но пӧзьтӥллям. Табере луд кечез косӥллям Котофей Иванычез куное ӧтьыны.

— Ӵок, мынам кышкаса лулы ик интыяз ӧвӧл ни, — шуэм луд кеч.

Собере ӟичыез косӥллям.

— Ӵок, мынэсьтым зынме пуныос шӧдозы, — шуэм ӟичы.

Табере ини кионэз косо.

— Ӵок, мынам пыд дыбыртэ, кылозы, — шуэм кион.

Собере гондырез косо.

— Ӵок, мынам ворттэме уг луы, пыды канжаське, — шуэм гондыр.

Огзы но мынӥллямтэ. Собере пус чӧлтӥллям. Пус луд кечлы усем.

— Ок, инмаре, азьло ик кӧты шӧдэ ук, — шуыса, Котофей Иваныч доры луд кеч бӧрдыса мынэм.

Котофей Иваныч доры вуытэк ик, «Котофей Иваныч, ми доры куное лык», — шуыса, вань куаразэ поттыса кеськем. Ачиз кукъёсыз чигымон бызьыса кошкем.

Котофей Иваныч шумпотыса куное лыктэм.

Солэсь курдаса, ваньзы ик пегӟиллям: гондыр — пужым йылэ, кион — пужым улэ, ӟичы но луд кеч — силё улэ.

Котофей Иваныч вуиз, пе, но соку ик скал борды кутскиз.

— Мало, мало, мало, — шуыса, скалзэ кыска гинэ.

Луд кечен ӟичыен лушкемен кенешо, пе:

— Копак скалэз «мало» шуыса сие ведь, ачиз пичи гинэ.

Луд кеч кышкаменыз вырӟытэк чидамтэ ни. Вырӟыкуз силё лосрак! чигем. Котофей Иваныч, сое шыр кожаса, вылаз тэтчем. Луд кеч чирак кеськем. Котофей Иваныч, солэсь курдаса, пужым йылэ тубем. Гондыр курдаса пужым йылысь кион вылэ усем. Кыкен но отчы ик кулӥллям. Луд кечен ӟичы, силёысь потыса, ворттыса кошко вылэм но, коӵыш, соосты адӟыса, уйыны кутскем. Луд кечен ӟичы, кышкаса, сюлэмзы путыса, кыкен ик кулӥллям.