АЙНОАйно нимо нылы будэ — Куддыр кырӟа, куддыр бӧрдэ, Гожъяськыкум азям тубе, Книгаосме кеся, шудэ. Куддыр огназ корка кыльса Шкапез усьтэ, сакар шедьтэ — Койка улэ лушке-е-ем пырса Кром! кром! сие но ӵаштыртэ. Борддор бордысь суредъёсыз Пукон вылэ тубса куя, Тазын, вуын пыласькыкуз Буль! буль! каре, пуке, уя... Мумиз доры лушке-е-ем лыктэ — Солэсь пыдзэ юн чепыльтэ; Вераськемез со пыӵкылэ, Тэтэ карса кема-а-а сылэ. — «Бырод таин, ёрмод таин!» — Шуса, мумиз весь сюлмаське: Султэ ӵукна, уг изь уин — Ас нылыныз весь вераське: — «Будӥз ке — та ми кадь уз лу: Выль улонэ шонер лобӟоз; Ми кадь кышкась, пеймыт уз лу— Пионере, КИМ-е пыроз!»... Нылы султэ... Борддор шоры Пичи кизэ каллен мыче: Отысь тодма со Ильичез — Мынны турттэ суред доры... Айно нимо нылы будэ — Куддыр кырӟа, куддыр бӧрдэ, Гожъяськыкум азям тубе, Книгаосме кеся, шудэ.
