МОН — УДМУРТ

Мон — удмурт. Мон — туж шудо!
Эрказ луи, бурдъяськи!
Сюлмам горд тылъёс будо.
Сьӧд дуннеысь мозмытски!

Октябр нуналэ, туннэ
Ульчае калык потоз:
Кудӥз потоз кырӟанэн
Кудӥз горд флагез кутоз.

Нокинлэсь возьдаськытэк
Удмурт дӥсьме дӥсяса,
Мон но пото кышкатэк
Горд кырӟанъёс кырӟаса.

Тани — мон но тӥ пӧлын,
Уно пӧртэм калыкъёс,
Мынам мылкыд —туж вылын,
Котырам — виль сюресъёс.

Та Октябрь ӧй ке лусал
Пеймыт гуын мон улсал:
«Гожмо шыр» нимы лусал,
Аслэсьтым возьдаськысал.

Горд Октябрь монэ ӝутӥз —
Калыкъёс радэ пыртӥз...
Мон — тани: татын сылко,
Удмурт кылын кырӟасько!

Мон — удмурт. Мон — туж шудо!
Эрказ луи, бурдъяськи!
Сюлмам горд тылъёс будо,
Сьӧд дуннеысь мозмытски!..