СЯСЬКАЯСЬКИСЬ ЛЬӦМПУ

Укно улын чебер льӧмпу,
Чебер льӧмпу някыръяське...
Таӵе дыръя коркан уд пук —
Чебер льӧмпу сяськаяське.

Солэн вылаз оло лымы
Уй котыртӥ усем лэся,
Оло лымы, оло мамык
Улвай вылаз пуксем лэся.

Оло кинке тӧдьы дэрем,
Юг-юг дэрем дӥсям лэся...
Оло вылаз йӧлвыл тырем,
Оло йӧлвыл пазям лэся.

Туж чебер ныл кадь, со сылэ
Укно улын някыръяське,
Юг-юг сылэ, учке вылэ —
Небыт тӧлын ӟыгыръяське.

Солэн дортӥз бубылиос
Тӧдьы лымы кадь лобало,
Уйын инмын кизилиос
Шораз учко, ворекъяло.

Укно улын чебер льӧмпу,
Чебер льӧмпу някыръяське...
Таӵе дыръя коркан уд пук —
Чебер льӧмпу сяськаяське!