Кага вольпась, дӧрӧм, рузум Кага воԉпаԍ, ԁӧрӧм, рузум
Ёна жӧ ми гӧгӧрвотӧм, велӧдчытӧм мамъясыд омӧля челядьнымӧс быдтам. Чужӧмсяньыс кагаыд миян няйт пиын луасьӧ. Керкаад пыран да, ныртӧ косялӧ шомыс дук, — потанын шердйӧны кагаӧс. Видзӧдлан пытшкӧсас — юрлӧсыд оз нин тӧдчы кутшӧм вӧлӧма, няйтысла, кормӧмысла котшкакылӧ; дӧрӧмыд сэтшӧм жӧ, рузумыд кага улад медшогмытӧмтор вольсалӧма, вольпась эжӧдыд сісьмӧма нин, дук петӧ, лэптыштан кӧ, улас веглясьӧны номыръяс. Шебрасыд ыж ку. Вомас кагаыдлы сюйӧмаӧсь мӧс нёнь либӧ нюш рузум нёнь. Быд бӧрддзӧмысь нюш сюйӧны либӧ гӧрдӧдз пӧжӧм йӧв сюрӧ пукталӧны кагаыдлы. Јонажӧ мі гӧгӧрвотӧм, велӧԁчытӧм мамјасыԁ омӧԉа чеԉаԃнымӧс быԁтам. Чужӧмԍаԋыс кагаыԁ міјан ԋајт піын луаԍӧ. Керкааԁ пыран-ԁа ныртӧ коԍалӧ шомыс ԁук, — потанын шерԁјӧны кагаӧс. Віԇӧԁлан пыщкӧсас — јурлӧсыԁ оз-ԋін тӧԁчы кущӧм вӧлӧма, ԋајтысла, кормӧмысла кощка кылӧ; ԁӧрӧмыԁ сещӧм-жӧ, рузумыԁ кага улаԁ меԁ шогмытӧм тор воԉсалӧма, воԉпаԍ ежӧԁыԁ сіԍмӧма-ԋін, ԁук петӧ, лептыштан-кӧ, улас вегԉаԍӧны номырјас. Шебрасыԁ ыж ку. Вомас кагаыԁлы ԍујӧмаӧԍ мӧс ԋоԋ, ԉібӧ ԋуш рузум ԋоԋ. Быԁ бӧрԁԇӧмыԍ ԋуш ԍујӧны ԉібӧ гӧрԁӧԇ пӧжӧм јӧв ԍурӧ пукталӧны кагаыԁлы.
Миян коми аньяс пузчужӧм кагатӧ зэв топыда табъя вӧньӧн тӧбасны, ки-коксӧ. Кагаыд оз вермы ки ни кок вӧрзьӧдны, лолавны весиг оз вермы. Мукӧд шуӧны, мед пӧ кокыс оз чукля ло. Дерт сэсся горзас, бӧрдас кагаыд, асьтӧ кӧ нӧ гезйӧн кӧрталасны, кутшӧм? Мукӧд кагасӧ войтӧв кыскавлывлӧ, кӧрталӧмнад кӧ босьтас, вермас кувны. Міјан комі аԋјас пуз чужӧм кагатӧ зев топыԁа табја вӧԋӧн тӧбасны кі-коксӧ. Кагаыԁ оз вермы кі-ԋі кок вӧрԅӧԁны, лолавны веԍіг оз вермы. Мукӧԁ шуӧны, меԁ-пӧ кокыс оз чукԉа ло. Ԃерт сеԍԍа горзас, бӧрԁас кагаыԁ, аԍтӧ-кӧ-нӧ гезјӧн кӧрталасны кущӧм? Мукӧԁ кагасӧ војтӧв кыскавлывлӧ, кӧрталӧмнаԁ-кӧ боԍтас, вермас кувны.
Кага мед вермӧ пыр кинас и кокнас вӧрны, став морӧснас лолавны. Пузчужӧм кагалӧн дӧрӧм мед паськыд, коскӧдзыс, вожыс мышкуас, некутшӧм прут ни гӧрӧд мед эз вӧв, куйлігмозыс мед киясас сюйны да шымыртны. Коссянь сэсся небыд шоныд рузумӧн гартыштны, кияс мед дзик прӧстӧсь. Шебрӧдны вата вылын либӧ кудель вылын вурӧм эшкынӧн. Ыж ку эшкынӧн оз ков шебрӧдны, сійӧн гожӧмын кагаяс пӧжсьӧны, тойӧссьӧны. Мыйӧн кага быдмыштас, киын вӧдитны пондыны позяс, колӧ прамӧй дӧрӧмӧн пасьтӧдны. Юр тӧбны гартны немторйӧн оз ков, мед оз пӧсяв. Дӧрӧмъяс, рузумъяс небыдысь колӧ вӧчны да зэв пелька колӧ видзны. Мамъяслы весиг оз ков кагаӧс ас дінаныс узьтӧдлыны; верман пӧдтыны узигад, сэсся гырысьыд уджалігад няйтчан, бусӧссян, пӧсялан: кагаыдлы лоӧ лёк бусӧсь, ньылӧм дука воздухнас лолавны. Медся лӧсьыд торйӧн кагалы лӧсьӧдны вольпась. Ёна ичӧтдырйи ньӧрйысь кыӧм кӧрзинкаӧ, сэтчӧ вольпась идзасысь либӧ бур турунысь пуктыны, эм кӧ клеёнка тор, вольпась вылас вольсавны, мед оз кӧтась; абу кӧ, эжӧдсӧ кыкӧс вӧчны да вежлӧдлыны, мед шомыс дук оз пет. Кагалы оз ков вывті небыд вольпась вӧчны, мед оз пӧсяв. Кага тыра кӧрзина колӧ пуктыны вылӧ, лабичӧ, оз ков джоджӧ. Мамъяс, шыблалӧй зыбкаяснытӧ (потан). Качайтӧм зэв омӧльтор. Ас сертиныд думыштӧй. Муртса кӧ пыжын либӧ качай вылын качнитас, быдӧн шогӧдас, юр вежӧр вошӧ. Кагаыдлӧн юр вежӧрыд пыр качайтӧмсьыд сідзи жӧ вошласьӧ, шогӧдӧ сійӧс. Сійӧн миян челядьыд быдмасны омӧль юр вежӧраӧсь, паметьтӧмӧсь. Кага меԁ вермӧ пыр кінас і кокнас вӧрны, став морӧснас лолавны. Пуз чужӧм кагалӧн ԁӧрӧм меԁ паԍкыԁ, коскӧԇыс, вожыс мышкуас, ԋекущӧм прут ԋі гӧрӧԁ меԁ ез вӧв, кујліг-мозыс меԁ кіјасас ԍујны ԁа шымыртны. Косԍаԋ сеԍԍа ԋебыԁ шоныԁ рузумӧн гартыштны, кіјас меԁ ԇік прӧстӧԍ. Шебрӧԁны вата вылын ԉібӧ куԃеԉ вылын вурӧм ешкынӧн. Ыж ку ешкынӧн оз ков шебрӧԁны, сіјӧн гожӧмын кагајас пӧжԍӧны, тојӧԍԍӧны. Мыјӧн кага быԁмыштас, кіын вӧԃітны понԁыны поԅас, колӧ прамӧј ԁӧрӧмӧн паԍтӧԁны. Јур тӧбны гартны ԋемторјӧн оз ков, меԁ оз пӧԍав. Ԁӧрӧмјас, рузумјас ԋебыԁыԍ колӧ вӧчны ԁа зев пеԉка колӧ віԇны. Мамјаслы веԍіг оз ков кагаӧс ас ԁінаныс уԅтӧԁлыны; верман пӧԁтыны уԅігаԁ, сеԍԍа гырыԍыԁ уҗалігаԁ ԋајтчан, бусӧԍԍан, пӧԍалан: кагаыԁлы лоӧ ԉок бусӧԍ, ԋылӧм ԁука возԁукнас лолавны. Меԁԍа лӧԍыԁ торјӧн кагалы лӧԍӧԁны воԉпаԍ. Јона ічӧтԁырјі ԋӧрјыԍ кыӧм кӧрԅінкаӧ, сетчӧ воԉпаԍ іԇасыԍ ԉібӧ бур туруныԍ пуктыны, ем-кӧ кԉејонка тор воԉпаԍ вылас воԉсавны меԁ оз кӧтаԍ; абу-кӧ, ежӧԁсӧ кыкӧс вӧчны ԁа вежлӧԁлыны, меԁ шомыс ԁук оз пет. Кагалы оз ков вывті ԋебыԁ воԉпаԍ вӧчны, меԁ оз пӧԍав. Кага тыра кӧрԅіна колӧ пуктыны вылӧ, лабічӧ, оз ков җоҗӧ. Мамјас, шыблалӧј зыбкајаснытӧ (потан). Качајтӧм зев омӧԉ тор. Ас-ԍерԏіныԁ ԁумыштӧј. Муртса-кӧ пыжын ԉібӧ качај вылын качԋітас, быԁӧн шогӧԁас, јур вежӧр вошӧ. Кагаыԁлӧн јур вежӧрыԁ пыр качајтӧмԍыԁ сіԇі-жӧ вошлаԍӧ, шогӧԁӧ сіјӧс. Сіјӧн міјан чеԉаԃыԁ быԁмасны омӧԉ јур вежӧраӧԍ, памеԏтӧмӧԍ.
Кагалысь став кӧлуйсӧ колӧ вывті сӧстӧма, мичаа видзны. Быд мамлы колӧ яндысьны шомыс дукысь, няйт челядьысь. Дзик прӧстӧй сёрни коми аньяслӧн, крестьяналӧн — ми пӧ огӧ эштӧй пелькӧдчыны, колӧ пӧ уджавны, ми пӧ ӧд абу господаяс. Велалан кӧ пелька овны, пыр нин сюрас пӧраыд пелькӧдчӧм вылад. Лэччысян кӧ дуркӧ, дышӧ, дерт позьӧ удж вылӧ ыстысьны. Пелька олысь мортлы пелькӧдчӧмыд кынӧм сюмалӧм кодь жӧ. Оз ков вунӧдны: пелька олӧмын миян дзоньвидзалунным. Кагалыԍ став кӧлујсӧ колӧ вывті сӧстӧма, мічаа віԇны. Быԁ мамлы колӧ јанԁыԍны шомыс ԁукыԍ, ԋајт чеԉаԃыԍ. Ԇік прӧстӧј ԍорԋі комі аԋјаслӧн, кресԏаналӧн — мі-пӧ огӧ ештӧј пеԉкӧԁчыны, колӧ-пӧ уҗавны, мі-пӧ-ӧԁ абу госпоԁајас. Велалан-кӧ пеԉка овны, пыр-ԋін ԍурас пӧраыԁ пеԉкӧԁчӧм вылаԁ. Летчыԍан-кӧ ԁуркӧ, ԁышӧ, ԃерт поԅӧ уҗ вылӧ ыстыԍны. Пеԉка олыԍ мортлы пеԉкӧԁчӧмыԁ кынӧм ԍумалӧм-коԃ-жӧ. Оз ков вунӧԁны: пеԉка олӧмын міјан ԇоԋвіԇалунным.
Комиӧн гижис
Ӧньӧ Агни
Важ коми гижӧд