Мый колӧ тӧдны быд нывбабалы Мыј колӧ тӧԁны быԁ нывбабалы
Шоч нывбабаыс деревняад тыр-бур дзоньвидза. Унджыкыс висьӧ кутшӧмкӧ да кутшӧмкӧ висьӧмӧн. Сэтшӧм висьӧмъясыс нывбабаӧс томӧн-кадӧн пӧрысьтӧны, мисьтӧммӧдӧны, омӧльтчӧдӧны. Став висьӧмыс нывбабалӧн асьсӧ видзтӧм, дӧзьӧриттӧм вӧсна. Медся ёна нывбаба висьмӧ сьӧкыд дырйи да челядясьӧм бӧрын. Деревняын ӧд скӧтнысӧ ёнджыка дӧзьӧритӧны сьӧкыд нывбабаӧс дорысь. Томысянь ёна сьӧкыда уджӧдӧмысь нывъяс омӧльтчӧны, вынтӧммӧны, ичӧт тушааӧсь лоӧны. Сійӧн найӧс колӧ видзны сьӧкыд уджъясысь. Медся нин колӧ аслыныс видзчысьны тӧлысся дырйи, вылад дырйи. Сэки нывбаба медъёна асьсӧ вермӧ жугӧдны сьӧкыд уджъяснад. Вывті ёна кӧ мунӧ да висьӧдӧ сэки, колӧ докторлы петкӧдчывны. Сэки оз позь купайтчыны кӧдзыд ваын, колӧ унджыкысь мыськавны вирсӧ шоныд ваӧн, мед оз кормы, дуксьы, кӧлуйтӧ вежлавны, оз ков няйтӧн сэки овны. Шоч нывбабаыс ԃеревԋааԁ тыр-бур ԇоԋвіԇа. Унҗыкыс віԍӧ кущӧмкӧ ԁа кущӧмкӧ віԍӧмӧн. Сещӧм віԍӧмјасыс нывбабаӧс томӧн-каԁӧн пӧрыԍтӧны, міԍтӧммӧԁӧны, омӧԉтчӧԁӧны. Став віԍӧмыс нывбабалӧн аԍсӧ віԇтӧм, ԁӧԅӧріттӧм-вӧсна. Меԁԍа јона нывбаба віԍмӧ ԍӧкыԁ-ԁырјі ԁа чеԉаԃаԍӧм бӧрын. Ԃеревԋаын-ӧԁ скӧтнысӧ јонҗыка ԁӧԅӧрітӧны ԍӧкыԁ нывбабаӧс ԁорыԍ. Томыԍаԋ јона ԍӧкыԁа уҗӧԁӧмыԍ нывјас омӧԉтчӧны, вынтӧммӧны, ічӧт тушааӧԍ лоӧны. Сіјӧн најӧс колӧ віԇны ԍӧкыԁ уҗјасыԍ. Меԁԍа-ԋін колӧ аслыныс віԁчыԍны тӧлыԍԍа-ԁырјі, вылаԁ-ԁырјі. Секі нывбаба меԁ јона аԍсӧ вермӧ жугӧԁны ԍӧкыԁ уҗјаснаԁ. Вывті јона-кӧ мунӧ ԁа віԍӧԁӧ секі, колӧ ԁокторлы петкӧԁчывны. Секі оз поԅ купајтчыны кӧԇыԁ ваын, колӧ унҗыкыԍ мыԍкавны вірсӧ шоныԁ ваӧн, меԁ оз кормы, ԁукԍы, кӧлујтӧ вежлавны, оз ков ԋајтӧн секі овны.
Дзоньвидза нывбабалы сьӧкыд дырйи ньӧти оз ков висьны. Висьмас кӧ ки-кок или чужӧм пыктас, вир мыччысяс, колӧ докторлы или бабкалы петкӧдчывны. Вир кӧ петкӧдчас, оз позь кӧдзыд ни пӧсь ваын купайтчыны. Узьны колӧ пӧттӧдз, час 8, сьӧкыдтор оз позь вӧчны. Кык тӧлысь войдӧр эновтны став сьӧкыд уджъяс, шойччыны, мед кокньыдджык челядясьны лоӧ: вынтӧ, эбӧстӧ колӧ сэк кежлӧ видзны, сэки и кагаыд дзоньвидза, ён чужас. Ԇоԋвіԇа нывбабалы ԍӧкыԁ-ԁырјі ԋӧԏі оз ков віԍны. Віԍмас-кӧ кі кок іԉі чужӧм пыктас, вір мытчыԍас, колӧ ԁокторлы іԉі бабкалы петкӧԁчывны. Вір-кӧ петкӧԁчас, оз поԅ кӧԇыԁ ԋі пӧԍ ваын купајтчыны. Уԅны колӧ пӧттӧԇ, час 8, ԍӧкыԁ тор оз поԅ вӧчны. Кык тӧлыԍ војԁӧр еновтны став ԍӧкыԁ уҗјас, шојтчыны, меԁ кокԋіԁҗык чеԉаԃаԍны лоӧ: вынтӧ, ебӧстӧ колӧ сек кежлӧ віԇны, секі і кагаыԁ ԇоԋвіԇа, јон чужас.
Крестьянка миян челядясян лунӧдзыс сьӧкыд удж вылын, унаысь удж вылын, видз-му вылас челядясьлас. Сы вӧсна миян нывбабалӧн став висьӧмыс водз пӧрысьмӧмыс, кості кулӧмыс. Асланыс пемыдлуннаныс, йӧйлуннаныс асьнысӧ нинӧмӧ воштӧны. Кодлы дона дзоньвидзалун, кузь нэм, долыд олӧм, челядясьны колӧ больничаын, абу кӧ больнича — корны велӧдчӧм бабкаӧс. Став кӧлуйыс челядясьысь дінын колӧ сӧстӧмсьыс-сӧстӧм (вольпась, дӧрӧм, ки бабкалӧн). Няйтыд кӧ веськалас маткаад, сэки нывбаба вермас висьмыны. Оз ков сизим лунысь водз чеччыны челядясьӧм бӧрын. Куим вежон мысти позяс кокньыдик уджӧ кутчысьны. Сьӧкыд удж вылӧ сӧмын кык тӧлысь мысти позьӧ петны. Дас лун мысти вирлы оз нин ков мыччысьны. Мыччысяс кӧ, сэки колӧ бабка дінӧ петкӧдчывны. Узьны мужиккӧд весиг оз позь кык тӧлысь тыртӧдз челядясьӧм бӧрын. Креԍԏанка міјан чеԉаԃаԍан лунӧԇыс ԍӧкыԁ уҗ вылын, унаыԍ уҗ вылын, віԇ-му вылас чеԉаԃаԍлас. Сы-вӧсна міјан нывбабалӧн став віԍӧмыс воԇ пӧрыԍмӧмыс, кості кулӧмыс. Асланыс пемыԁлуннаныс, јӧјлуннаныс аԍнысӧ ԋінӧмӧ воштӧны. Коԁлы ԁона ԇоԋвіԇалун, куԅ нем, ԁолыԁ олӧм, чеԉаԃаԍны колӧ боԉԋічаын, абу-кӧ боԉԋіча — корны велӧԁчӧм бабкаӧс. Став кӧлујыс чеԉаԃаԍыԍ ԁінын колӧ сӧстӧмԍыс сӧстӧм (воԉпаԍ, ԁӧрӧм, кі бабкалӧн). Ԋајтыԁ-кӧ веԍкалас маткааԁ, секі нывбаба вермас віԍмыны. Оз ков ԍіԅім луныԍ воԇ четчыны чеԉаԃаԍӧм бӧрын. Кујім вежон-мыԍԏі поԅас кокԋіԃік уҗӧ кутчіԍны. Ԍӧкыԁ уҗ вылӧ сӧмын кык тӧлыԍ-мыԍԏі поԅӧ петны. Ԁас лун мыԍԏі вірлы оз-ԋін ков мытчыԍны. Мытчыԍас кӧ, секі колӧ бабка ԁінӧ петкӧԁчывны. Уԅны мужіккӧԁ веԍіг оз поԅ кык тӧлыԍ тыртӧԇ чеԉаԃаԍӧм бӧрын.
Доктор Нондерберг. Ԁоктор Нонԃерберг.
Комиӧн гижис
Ӧньӧ Агни
Важ коми гижӧд