РЕВОЛЮЦИЯ ДА КОМИ КЫВ
Важӧн коми морт вылӧ видзӧдісны пон вылӧ моз, коми кыв шулісны пон кывйӧн. Кыдзи вермисны, сідзи и увтыртісны коми мортӧс. Туйӧ ветлігӧн оз лысьтны вӧлі сёрнитны ӧдйӧджык комиӧн, пыр и серавны вӧлі кутасны рочьяс, кодъяс асьнысӧ вылӧджык пуктылісны сэки. Коми нывъяс вӧлі паракодъяс вылӧ Рочӧ ветлігӧн оз нин лысьтны кыв шуны комиӧн — роч зонъяс матӧ воштасны. Коми салдаткӧд мыйсӧ эз керлыны. Сэки нин вӧлі коми йӧзлы «Зырянская морда». Лӧсьыд вӧлі сэки рочьяслы коми йӧзтӧ кедзовтныд. На дор оліс сэки роч сар, роч чиновникъяс. Коми йӧз дор коді оліс? Некод эз. Весиг коми йӧзыд ачыс оз куж ас дорыс овны. Мукӧд коми мортыс мыйкӧ вылӧ ыштыліс да сар политика серти овліс, ас йӧзсӧ увтыртіс, омӧльтліс ассьыс чужан кывсӧ.
Ӧні коми кыв увтыртӧмлы воис пом. Важӧн кӧ рочьяс шулісны «Россия для русских», ӧні колӧ шуны «Россия для всех народов». Уджалысь йӧз шуис: тырмас пӧ коми кыв вылын серавны. Мед пӧ школаын велӧдны кутасны комиӧн, суддяяс коми йӧзкӧд комиӧн жӧ кутасны сёрнитны! Уджалысьяслӧн кывйыс имитіс.
Ӧні гижалӧны коми нигаяс. Комиӧн жӧ печатайтӧны газет «Югыд туй» (гашкӧ кодкӧ и лыддьывліс да). Ӧні коми обласьтын некод нин оз яндысь комиӧн сёрнитӧмысь (кодсюрӧ зэв тшапъясысь кындзи).
Но сюся видзӧдӧй, коми ёртъяс, уджалысь йӧз: нырсӧ лэптӧны роч шовинистъяс, вашкӧдӧны пель водзас быдӧнлы: «Ӧні став гырысь суддяыс пӧ жыд». Роч шовинистъяслы аслыныс бара окота пуксьыны суддяясӧ, мед эськӧ бӧр вермисны шуны «Россия для русских». Еврейясӧс важӧн коми йӧзӧс моз жӧ кедзовтлісны. Найӧ коми йӧзлы омӧльтор эз вӧчны.
Комиӧн