КОМИ ЙӦЗ ИСТОРИЯЫСЬ
Важӧн, коркӧ уна сюрс сё во сайын, коми йӧз овлӧмаӧсь зэв паськыдінын: асыв-войвыв Россия юкӧнас вӧлӧма ставыс коми (ӧнія Мӧскуаясын быдӧн). Сэсся дырӧн найӧс зырӧмаӧсь асыв-войвыв Россия пельӧсӧдз.
Коми йӧзлӧн вӧлӧма асланыс князьяс (ӧксыяс). Ӧнія Перымскӧй губерняын вӧлӧма княжество «Пермь Великая». Сійӧс роч сар Иван ІІІ пӧкӧритӧма 1472 воын. XV нэмын локтӧма Степан Перымскӧй. Сійӧ Эжва вожса да Сыктыв вожса комиӧс Кристос вераӧ пыртӧма.
Сыӧдз коми йӧз юрбитлӧмаӧсь уна енлы. Медыджыд енмыс вӧвлӧма енэж. Сійӧс шулӧмаӧсь «ен». Сэсся юрбитӧмаӧсь шонділы, тӧлысьлы, Войпельлы, ёмалы. Енъяслы вайлӧмаӧсь козинъяс (жертва), бурмӧдлӧмаӧсь найӧс. Ӧнія попъяс пыдди сэки вӧвлӧмаӧсь тунъяс, найӧ кевмысьлӧмаӧсь енъяс водзын.
Степан Перымскӧй комиӧн гижлывлӧма нигаяс и велӧдӧма мукӧдӧс комиӧн гижны-лыддьыны. Сы дырйи Эжва-Сыктывса комияслӧн юркарыс вӧлӧма Емдін.
Сэтчӧ Степан Перымскӧй епископ кафедра лӧсьӧдӧма. Сійӧс пуктісны коми йӧз вылын ыджыдӧ.
Степан Перымскӧй зэв ёна сулаліс коми йӧз понда. Сійӧ эз лэдз некодлы коми йӧзӧс кедзовтны.
1385 воын сійӧ вӧтліс новгородса роч рӧзбойникъясӧс, кодъяс коми йӧзӧс вӧлі локтӧмаӧсь грабитны. Йӧграӧс сійӧ воӧ жӧ вӧтліс.
1386 воӧ Коми муын няньыс кынмӧма. Сэки, сійӧ корӧм кузя, коми йӧзӧс мездісны вотысь.
Степан Перымскӧй кулі 1393 воын. Степан Перымскӧй бӧрын лоины роч епископъяс. Найӧ коми йӧз понда омӧля тӧждысисны.
1585 воын Емдінысь епископ кафедра нуӧмаӧсь Вӧлӧгдаӧ. Сэсянь Коми му кутіс лыддьысьны прӧстӧй вӧлӧсьтӧн.
Степан Перымскӧйсянь Коми му сюри Мӧскуа ки улӧ. Пукталісны роч суддяясӧс, вот перйысьясӧс. Суддяяс кутісны дзескӧдны коми йӧзӧс. Коми йӧз — рам йӧз, но мукӧд дырйиыс терпенньӧсьыс петлісны и паныд сувтлісны суддяясыдлы.
Николай І сар дырйи Кулӧмдінын вӧлӧма восстанньӧ: корӧмаӧсь вот чинтыны. Сы пыдди Кулӧмдінса йӧзсӧ йи вылын розгаӧн нӧйтӧмаӧсь.
Ӧні коми йӧзлы бӧр ас киас ассьыныс олӧмнысӧ сетісны. Некод оз боксянь конъявлы найӧс. Ассьыныс олӧмтӧ асьныд лӧсьӧдӧй!
Комиӧн