| ОТСАЛӦЙ ТШЫГЪЯЛЫСЬЯСЛЫ | |
| Коді эз тӧдлы тшыгъялӧм? Эжва йывсалӧн некор оз вун 1919 во. Оз вунӧдны кыдзи сёйлісны кач, кыдзи дундывлісны, кулалісны; оз вунӧдны, кутшӧмӧсь челядьныс вӧліны, кыдзи найӧ ки-коксьыныс усьліны, кулалісны. Оз ков сійӧс вунӧдны! Оз вун и салдатъяслӧн тшыгъялӧм! | |
| Таво лунвылын нянь ньӧти эз во: ставыс косьмис. Войдӧр вӧлі кытысь няньсӧ миянӧ вайӧны, таво сэні тшыгъялӧны. Тшыгъялысьыс нелямын миллион дорысь унджык. (Став коми йӧзыс миллион джын сӧмын). Налы сёйны нинӧм, став идзассӧ нин, скӧтнысӧ нин сёйӧмаӧсь. Тшыгысла да висьӧмысла вывті уна кутӧма йӧзыс кувны. Самараын пӧ улич вывсьыс быд вой сюрӧ ветымын-квайтымын морт шой. Ставыс найӧ тшыглы кулӧм йӧз. Сідзи кулӧны быд карын, быд сиктын Волга кузя. Челядьыс, тӧдӧмӧн ещӧ ёна кулӧ. Быдлаын пӧ туй кузя туплясьӧ шой; мӧдӧдчасны, коньӧръяс, нянь корсьны, эбӧссьыныс усясны да туй вылас и кулӧны. | |
| Ветлӧдлӧны быдлаын челядь, вижӧдӧм чужӧмаӧсь, куш лыныс, паськӧмтӧмӧсь. Корсьысьӧны, абу-ӧ кодкӧ шыбитӧма сёянтор. | |
| Вывті уна тшыгъялысьыс. Быдӧнлы кӧ сетны пуд джынйӧн тӧлысь кежлӧ, ковмас кызь миллион пуд нянь ӧти тӧлысь кежлӧ. Выль нянь вотӧдз сё нелямын миллион пуд. Правительство некод отсавтӧг сы мында няньсӧ лӧсьӧдны оз вермы, колӧ босьтчыны быдӧнлӧн отсавны кыдз мый верманныд. | |
| Кымын дыр кежлӧ эновтчам отсалӧмысь, сымын уна йӧз, уна челядь тшыгла кулӧ. | |
| Батьяс-мамъяс, чойяс-вокъяс, отсалӧй! Ичӧтик отсӧг вермас мездыны ӧти мортӧс тшыглы кулӧмысь. | |
| Отсалӧй няньӧн, паськӧмӧн, деньгаӧн. Чуйдӧй мукӧдӧс отсавны! | |
| Энӧ вунӧдӧй ассьыныд тшыгъявлӧмнытӧ. | |
| Йиджтӧй сьӧлӧмӧдзныд тшыгъялысьяслысь шоглунсӧ, энӧ вунӧдӧй найӧс! | |
| Вомынын Микайлӧ Микайлӧвич Каракчиев, ыджыд семьяа морт, ыстӧма тшыгъялысьяслы пуд сю да пальто. Сійӧ мортыс, тыдалӧ, тӧдӧ тшыгъялӧмсӧ, оз жалит сетны тшыгъялысьяслы. Сідз жӧ вӧчӧй мукӧд. | |
Комиӧн
