ПӦРЫСЬ ГОЗЪЯ
Пӧльыс сур дозъя, пӧчыс печкана
Пуксьӧмаӧсь кыкӧн
Рытын би дорӧ — и кузь сёрниныс
Мунӧ ньӧжйӧникӧн.
Сёрнитӧны сэн важся олӧмсӧ,
Код нин тӧдсьыс вунӧм,
Кодыр вӧліс вир пӧчлӧн чужӧмас
И тшап ветлӧм-мунӧм.
Морта-мортыслы паныд оз шуны.
«Мый эз вӧвлы миян!
Наян томлунӧй! Ӧні эмӧсь нин
Пияннымлӧн пиян!»
Сідз пыр сёрниас томлун гаравсьӧ,
Код нин тӧдсьыс вунӧм,
Кодыр вӧліс вир пӧчлӧн чужӧмас
И тшап ветлӧм-мунӧм.
Сёрнитӧны, мый уна бур йӧз нин
Куйлӧ вичко дорас —
И шог найӧлы шуны: регыд ен
Сэтчӧ-й найӧс корас.
Коді вермис мый, босьтіс олӧмлысь,
Аддзывлісны гажсӧ,
Гаралӧны сідз ньӧжйӧн ас костас
Пӧрысь гозъя важсӧ.
Комиӧн гижис
Ӧльӧш Иван