НЕКОДЛЫ
Меям гӧтыр эм ас вӧсна ӧти, — и, дерт,
Сійӧс ог сет ме, ог вузав некодлы;
Сюр мем оз ков, — и фат мед оз сувтӧд, ни ферт,
Кыдз ог сувтӧдлы ачым ме некодлы.
Меям куим ур сӧмын тай лов сайын эм,
Да ме на кындзи эг кевмысь некодлы;
Сэтысь уджйӧзӧн сетны, дерт, ог вермы нем,
Абу уджйӧза-й ачым ме некодлы!
Меям абу казак, слӧн кодь кывзысь и рам,
Ог и ачым ме казачит некодлы;
Ог эльт некодӧс; эм менам вын, эм и сям,
Эльтӧм вылӧ ог сетчы ме некодлы.
Ог босьт, ог видзӧд йӧзлысь ме дзик нинӧмтор,
Мед ог нинӧмӧн дӧзмӧд ме некодлы;
Меным некодӧдз абу мог; мед нинӧкор,
Кыдз кӧть ола ме, мог оз ло некодлы!
Комиӧн гижис
Ӧльӧш Иван