КОМИ ЖУРНАЛЫД ЛОӦ

 

Тӧлысь нёль сайын, гожӧмнас, ми «Коми гижӧм» лист бокын, 3-ӧд номерын, гижлім: «Водзӧ пондам мырсьыны тайӧ „Коми гижӧм“ лист боксӧ пӧртны коми литература журналӧ». Тайӧ уджыс миян водзын век сулаліс дай водзӧ кежлӧ пондас сулавны: коми литература оз сӧвмы, оз артмы бур коми литература кыв, оз содны да ёнмыны коми гижысьяс, КАПП-лӧн уджыс оз понды тыдавны, оз вермы коми литература отсасьны коми йӧзлы выль олӧм лӧсьӧдны — оз кӧ понды некӧн коми литератураыс печатайтчыны, некысь кӧ лоӧ коми гижӧмсӧ лыддьыныс.

Ми талун лэдзам 20-ӧд листбок «Коми гижӧм». Уна коми гижысьлысь мича гижӧдторъяс петкӧдлім тайӧ кызь лист бокас, уна том, выль коми гижысьяс югдісны тайӧ лист бокӧн; уна, дас сы мында, мича гижӧдъяс, дас сы мында выль коми гижысьяс эз веськавны «Коми гижӧм» лист бокӧ — эз тӧрны.

Колӧ коми литература журнал. Но тайӧ воясӧ татшӧм журнал лӧсьӧдны оз на ло со мый вӧсна: ӧні ми гӧльлун вӧсна, ичӧт типография вӧсна да мукӧдторъяс вӧсна — огӧ на вермӧй лэдзны крестьяналы колан быдсяма коми нига, уна на зэв коланторъяс оз тӧрны «Коми сикт» газетӧ; сідзкӧ, ӧнія воясӧ, медколантор миян, медводз колӧ лӧсьӧдны коми крестьяналы журнал, сэн, эськӧ, мед вӧлі лючки, комиӧн гижӧма крестьяналы быдтор йылысь, быд колантор йылысь. Ӧні ми уна сикас журнал огӧ на вермӧ лэдзны — сідзкӧ тайӧ журналас ӧні кежлӧ позьӧ лӧсьӧдны «Коми литература юкӧд» (абу нин лист бок сӧмын).

ВКП-лӧн Обком тадзи моз и шуис: коми крестьяналы пӧ коми журнал — зэв колантор; колӧ пӧ сэтчӧ лючки гижны налы быдсяма колантор йывсьыс, колӧ пӧ тшӧтш сэтчӧ лӧсьӧдны коми литература юкӧд; журнал лэдзны октябр тӧлыссянь быд тӧлысьын ӧтчыд.

Сідзкӧ коми крестьяналы ӧні, вежонся ӧти газет кындзи да во гӧгӧрӧн 10 кымын коми нига кындзи, быд тӧлысьын ӧтчыд пондас петны бура кыз коми журнал.

Сідзкӧ КАПП-лӧн «Коми гижӧм» лист бок пыдди лоӧ быдса «Коми литература юкӧд» (нига лист бок кодь кызь кымын).

КАПП босьтчис «Коми гижӧм» лист боксянь.

Регыдӧн пӧртім сійӧ лист боксӧ «Коми литература юкӧдӧ» коми журналын.

Уджыштам, олыштам — пӧртам тайӧ «Коми литература юкӧдсӧ» коми литература журналӧ.

Ёртъяс, коми гижысьяс, тувччалӧй водзӧ!

 

А. Чард.

Гижӧд
Коми журналыд лоӧ

lkejrlkelkrgner klrjnelknfrkl ekjnrjkenfrej

1