КОЛЯН ВОСЯ НОГ ЭНӦ УДЖАЛӦ
Колян воясын ур да мукӧд звер ку босьтасьысьяс кост муніс зэв ыджыд мырддьысьӧм, рочӧн кӧ — конкуренция. Медъёна вермасисны Госторглӧн агентъяс кооперациякӧд. Вӧлі вӧтлысьӧны быд ур ку бӧрсянь. Оз на вевъяв дядьӧыд воны вӧрсьыс, а найӧ кыйӧдӧны нин, кутчысьӧны ур бӧжад.
Тадзи мырддьысигад лои налы вылӧ лэптыны ур ку донсӧ. Сэсся водзысянь вӧралысьяслы лои уна сетӧма уджйӧзӧн. Кор сувтіс ньӧбасян, ур куяс чукӧртан кад, сэки уджйӧзъяс мынтысьӧм лои омӧль. Вӧралысьяс нуисны ассьыныс прӧмыссӧ бокӧ, вузалісны сэтчӧ, кытӧн сетӧны уна сьӧм да бур тӧвар. Мукӧд агент быд ногӧн сибӧдіс ас бердас вӧралысьястӧ: юктӧдіс винаӧн, аскурӧн, чинталіс, лэдзис тӧваръясысь донсӧ, вылӧджык мынтіс звер куяс вылӧ.
Татшӧм мырддьысьӧмыд сувтіс государстволы да кооперациялы зэв вылӧ. Бӧрти арталісны да, ӧти-мӧд босьтасьысьлӧн лоӧма убыткаяс. Веськыда кӧ шуны — казналысь сьӧм лотайтысьясӧс колӧ вӧлі сетны судӧ, чорыда мыждыны. Сӧмын миян век на прӧститалӧны, мыждӧм пыдди ошкӧны. Кужин пӧ уна ур ку чукӧртны да, сы вӧсна зэв шань морт. Оз лыддьыны, мый государстволы сійӧ вайис уна омӧльторъяс.
Таво ми чорыда нуӧдам режим экономии, тӧждысям бырӧдны ковтӧм рӧскодъяс. Сідзкӧ колӧ локтан заготовкаяс дырйи бура уджавны, вунӧдны колян вося йӧй олӧмсӧ. Колӧ бырӧдны конкуренция, дугдыны сетавны уджӧн, оз ков лэптыны урлысь дон мукӧдысь вылӧ. Коді кутас бара быд ногӧн пӧрйӧдлыны ур куястӧ, сэтшӧмсӧ колӧ дивитны да мыждыны.
Босьтасьысьяс ӧні лоӧ этшаджык. Оз кут ньӧбасьны Хлебопродукт. Госторглӧн сідзжӧ кольӧны агентъяс сӧмын гырысь сиктъясын. Госторг кутас уджавны кооперация пыр. Сылӧн вӧчалӧма нин кооперативнӧй Союзъяскӧд договоръяс. Потребительскӧй обществоясысь ӧтдор, пондасны ньӧбасьны, чукӧртны ур да звер куяс сельскокӧзяйственнӧй да кредитнӧй кооперативъяс.
Таво колӧ ёна видзчысьны, мед эськӧ оз кутны косясьны асьныс кооперативъясыс. Сыысь лёк нинӧм абу. Кооперацияыдлы колӧ петкӧдлыны ассьыс выль ногӧн уджалӧмсӧ, бур туйӧд мунӧмсӧ. Комвнуторг водзын бара сулалӧ ыджыд удж. Сылы ковмас мичаӧ видзӧдны, штрапуйтны дон лэптысьясӧс. Вӧлӧсьтувса сӧветъяслы сідзжӧ лоӧ отсавны конкуренция бырӧдны.
Коми крестьяна водзын сулалӧ сьӧкыд во. Ми газетын гижлім нин, мый кооперация вермас таво бура кокньӧдны олӧм. Сӧмын оз ков вунӧдны мынтыны сэтчӧ важ уджйӧзъястӧ. Мукӧд кооперативын став тӧварсӧ да сьӧмсӧ сеталӧма уджйӧзӧн. Дерт, он кӧ сэні чукӧрт уджйӧзъястӧ, вермас кооперативыд тупкысьны, разьсьыны. Колӧ важ уджйӧзъяс быд вӧралысьлы мынтыны. Сӧмын сэки кооперативыд бӧр ёнмас, кыптас да водзӧ вылӧ отсалас.
Кооперативъяслы таво колӧ быдлаын босьтны сьӧла. Сійӧ сетас вӧралысьяслы ыджыд отсӧг. Ур куяс да сьӧла вылӧ колӧ сетны сэтшӧм дон, кутшӧмӧс пуктасны вылісянь, обласьтувса карын. Сэтӧн лӧсьӧдасны бур дон. Крестьянатӧ сэні оз жмитны. Сӧвет власьт сулалӧ чорыда крестьяна дор.
