КАРТУПЕЛЬ ЗЭВ ЁНА МӦДӦМА СІСЬМЫНЫ

Видзӧй картупельтӧ сісьмӧмысь

Быдлаын таво зэв ёна норасьӧны картупель сісьмӧм вылӧ. Му вывсьыс уберитігӧн эз пӧ ӧд уна и вӧв сісь картупельыс, а ӧні косьтігас пӧ мӧдіс мыйкӧ зэв ёна сісьмыны. Дерт, сісьмас, сісьмӧдан висьӧмыс водзӧджык нин кӧласьӧма да. Он кӧ мӧд ӧнісянь жӧ картупель висьӧмыскӧд вермасьны, тӧв шӧр кежлӧ на став картупельыд сісьмас да, тулыс кежлад дзик картупель кӧйдыстӧг колян.

Кыдзи нӧ колӧ картупельтӧ сісьмӧмысь видзны? Медводз колӧ став сісьмыны пондӧм картупельяс торйӧдны да ӧдйӧджык скӧтлы вердны пуӧмӧн. Кузя кежлӧ кӧ колян, ставыс сісьмас да весь вошӧ. Дзоньвидза картупельсӧ колӧ бура косьтыны-тӧлӧдны да вӧсньыдика гуӧ пуктыны. Кыза кӧ гуад пуктан, бара жӧ сэні мӧдас зэв ёна сісьмыны.

Картупель гутӧ вевттьыны топыда оз ков, мед шоныдыс да руыс сэтчӧ эз чукӧрмы. Шоныдінын да руаинын картупельыд зэв ӧдйӧ сісьмӧ.

Картупель гуын колӧ лӧсьӧдны кӧть коймӧд юкӧнсӧ кымын тыртӧмӧн, мед вӧлі позьӧ сэтчӧ картупельтӧ бӧрйигад дзоньвидзасӧ пуктыны. А тӧвнад ӧд таво ёна лоӧ дӧзьӧритны картупель гуястӧ. Ӧтчыд быд тӧлысьын колӧ нин таво картупель гуад пыравны да картупельтӧ сэтысь видлыны, оз-ӧ сійӧ сэні сісьмы. Мыйӧн казялан сылысь сісьмӧмсӧ, пырысь-пыр жӧ колӧ сісьмӧмсӧ бӧрйыны. Сісь картупель тӧлын позьӧ кынтыны скӧтыдлы вердӧм вылӧ.

Картупель гуяс кӧ он тупкы ӧнісянь да частӧджык мӧдан сісьмӧм картупель бӧрйыны да кӧдзыдджыкӧн сійӧ видзны, картупельыд ёна сісьмӧмсьыд дугдас. Оз мешайт вӧсньыдика на и пӧимӧн киськалыштны.

Картупель сісьмӧмкӧд вермасьӧм йылысь гижӧма 35 номерын «Коми сиктын» да «Югыд туй» газетын 160 да 164 номеръясын. Сэсся та понда жӧ гижӧма коми нигаын, нимыс «Картупель вӧдитӧм йылысь».

Коді кӧсйӧ картупельсӧ сісьмӧмысь видзны, колӧ бура тӧдны, мый та йылысь висьталӧны агрономъяс, колӧ лыддьыны, мый та йылысь гижӧма нигаясын да газетъясын.

В. Исаков.