МАТЫСМӦ УРОЖАЙ ПРАЗДНИК

Коми крестьяна, лӧсьӧдчӧй выставка вылӧ!

Революция бӧрын коми крестьяна чорыда босьтчисны кыпӧдны ассьыныс овмӧс, бурджыка заводитісны уджавны муяс: выль ногӧн да бурджык кӧлуйӧн.

Красноармеечьяс, пленысь локтысьяс, комсомолечьяс, селькоръяс да мукӧд велӧдчӧм йӧз — со кодъяс медводзын заводитісны выль ногӧн муяс уджавны; со кодъяс индӧны коми крестьяналы туй бурджыка уджавны муяс да кыпӧдны овмӧс.

Матысмӧ Урожай праздник. Татшӧм крестьяналысь бура муяс вӧдитӧмсӧ, бура уджалӧмсӧ ковмас петкӧдлыны став уджалысь водзын. Сы вӧсна Урожай праздник луннас быдлаын ковмас лӧсьӧдны выставкаяс.

Выставка вылын крестьяна видзӧдласны ассьыныс вогӧгӧрся уджалӧм вылӧ, тӧдмаласны ассьыныс лёкторъяссӧ, аддзыласны выль ногӧн да бурджык кӧлуйӧн муяс уджалӧмсӧ да водзӧ кежлӧ корсясны туйяс бурмӧдны ассьыныс кӧзяйствосӧ.

Выставка — зэв бур школа крестьяналы. Сэн петкӧдласны крестьяналы быдтор: кыдзи босьтны бурджык нянь урожай, кыдзи лӧсьӧдны бурджык кӧйдыс, кыдзи шабді бурджыка да мичаджыка воӧ, кутшӧм машинаяс колӧ судзӧдны крестьяналы. Зэв уна буртор вермасны аддзывны да тӧдмавны крестьяна выставка вылын.

Медъёна выставка дырйи колӧ тӧждысьны, мед унджык крестьяна выставка вылӧ волісны да унджыкӧн вайлісны петкӧдлантор. Кымын уна крестьянин вайлас выставка вылӧ петкӧдлантор, сымын уна пӧльза лоӧ выставкаысь.

Мыйясджык нӧ вайны крестьяналы выставка вылӧ?

Выставка вылӧ позяс вайны скӧт, кӧйдысъяс, пуктасъяс, машинаяс да мукӧдтор. Крестьянин ачыс тӧдас, мый сылӧн эм петкӧдланторйыс.

Выставка дырйи ковмас тӧдмавны бурджык петкӧдланторъяссӧ выставка вывсьыс да сійӧ крестьяналы ковмас сетны премия, мед водзӧ кежлӧ ещӧ ёнджыка босьтчисны найӧ бурмӧдны ассьыныс кӧзяйство.

Агрономъяслы да выставка лӧсьӧдысьяслы колӧ тӧждысьны, мед крестьяна — премия босьтысьяс — выставка дырйи асьныс висьталісны, кыдз найӧ бурмӧдісны ассьыныс кӧзяйствосӧ, кыдз налӧн воис бур кӧйдыс, урожай, кыдз быдмис налӧн гырысь да мича капуста, кузь шабді да мукӧд буртор кыдз лои.

Праздникӧдзыс коли сӧмын куим вежон. Вӧлӧсьтъясын лӧсьӧдӧмаӧсь праздниксӧ нуӧдны комиссияяс. Комиссияяслы ковмас чорыда босьтчыны уджавны. Колӧ ӧнісянь жӧ чукӧртны петкӧдланторъяссӧ, тӧждысьны, бур петкӧдланторъяс вылӧ судзӧдны премияяс. Ковмас чукӧртны та вылӧ торъя сьӧм. Кооперативъяс, мӧда-мӧдлы отсасян тӧвариществояс, волисполкомъяс да асьныс крестьяна, со кодъяс отсаласны сьӧмсӧ чукӧртны.

Матысмӧ праздник лун. Лӧсьӧдчӧй ставныд праздник кежлӧ!

К.