ВЕЛӦДЧӦМЫН МИЯН ВЫН
Регыд лоӧ тӧлысь, кыдзи сувтіс велӧдчан кад. Том челядь ветлӧдлӧны школаясӧ, паськӧдӧны ассьыныс вежӧрсӧ. Ӧні этша нин коли сэтшӧм пемыд дядьӧясыд, кодъяс мунӧны паныд велӧдчӧмлы, кутӧны ассьыныс пиянсӧ гортын.
Дерт, велӧдӧм оз быдлаын мун бура. Велӧдан удж торксьӧ унатор вӧсна. Мукӧдлаын кутӧма киссьыны став школаыс, став пукалан партаясыс, абу пескыс ломтысьнысӧ, оз тырмы нигаяс да гижсян кӧлуйыс.
Эмӧсь сэтшӧм школаяс, кытчӧ сиктса сӧветъяс оз и петкӧдлыны нырсӧ, вунӧдӧмаӧсь помӧдз. Татшӧминад, дерт, велӧдчӧмыд мунӧ лёка. Челядьыд сэсь пышйӧны гортас, волывлӧны сӧмын ворсны, балуйтчыны.
Ми ногысь, колӧ быд Волисполкомлы, быд сиктса сӧветлы бура тӧждысьны отсавны ас школалы. Колӧ шонтыны мичаӧ велӧданінъястӧ, лӧсьӧдны разьсьӧмторъяссӧ, сетны видзӧм вылӧ сьӧм. Таво ыджыд права сетӧма бюджет серти сиктъясӧ. Унджык школаясыс ӧні мунӧ вӧлӧсьтувса бюджет пыр. Мед эськӧ оз жӧ ло эновтӧма школаястӧ. Велӧдысьяслы колӧ кадын мынтыны сьӧмсӧ, отсавны налы шедӧдны нигаяс да мукӧдтор. Исполкомъясын да культурно-просветительскӧй секцияясын частӧджык колӧ кывзыны, сёрнитны школаса удж йылысь.
Миян обласьтын зэв на этша бур, сяммысь велӧдысьясыс. Налы ог на вермӧ сетны гырысь уджалан дон. Сэсся комиӧн велӧдӧм сьӧкыда артмӧ, оз тырмав велӧдан кӧлуй. Пырысь-пыр тайӧ бырӧдны огӧ вермӧ. Сы вӧсна школаяс миян эз на путьмыны, воны бур туй вылӧ. Сы вӧсна сьӧкыда босьтӧны и ыджыд школаясӧ.
Мукӧд крестьянин полӧ: коминад велӧдӧмсьыд пӧ пӧльза оз ло, дерт, лёка велӧдӧмысь тӧлк оз артмы, кӧть и рочӧн велӧдасны. Коми кывнад кокниджык велӧдчыны, регыдджык шедӧ сюсьлуныд. Сӧмын велӧдысьяслы колӧ сьӧлӧмсянь кутчысьны ас кывъяд, корсьны бурджык туйяс велӧдігӧн, сибӧдны ас кыв бердас став крестьянасӧ. Ӧти-мӧд учитель бура нин кужӧ выль ногыс уджавны.
Сэтшӧмыслы колӧ петкӧдлыны ассьыс сямсӧ ставлы газет пыр да чукӧртчӧмъяс вылын.
Коми том войтырлы ми тшӧктам бурджыка велӧдчыны. Сӧмын велӧдчӧмӧн ми вермам бырӧдны важ сьӧкыд олӧм, мунны водзӧ Ленин тшӧктӧм серти. Миян, коми йӧзлы, колӧ ёнджыка радейтны велӧдчыны. Мукӧд сёрниа войтырӧс колӧ вӧтӧдны.
