ВАЖКУА ВӦЛӦСЬТЫН

Кыдзи олӧны.

Важӧнсянь нин вӧлі гӧлиника олӧмыс вӧсна шуӧны Важкуатӧ Лӧдз Важкуаӧн. Тайӧ гӧля олӧмыс ӧніӧдз на век кыссьӧ. Гӧля олӧмыс вӧсна жӧ сэтысь абу и гырысь школаясын велӧдчысьясыд. Революция бӧрын крестьянаяс ёнакодь нин мырсьӧмаӧсь овмӧс кыпӧдӧм могысь, да сӧмын этша на жӧ водзас мунӧма-а. Нянь (сю да ид) артмӧ зэв омӧля. Пӧшти быд во либӧ кынмӧ, либӧ косьмӧ. Нянь уджалан местаыс зэв улын да и некутшӧм ыб (гӧра) абу. Мӧд-кӧ, став муыс лыа. Сы вӧсна и косджык гожӧмъясӧ няньыд косьмӧ, а увтасысла пӧшти быд во кынмӧ. Унджык йӧзыс войдӧр и ӧні ветлӧ заводӧ (пес керавны), а этшаджыкыс лэдзӧны кер да шпал леснӧй фирмаяслы. Крестьянство помысь олысь некод абу. Став йӧзыс зэв няньтӧмӧсь и быд воӧ босьтӧны аслыныс сёйны нянь и вӧлӧга.

Скӧт видзанін Важкуаын зэв омӧль. Тулыссяньыс скӧтыд ветлӧ вӧрын, а вӧр пасьтаыс эмӧсь зэв гырысь нюръяс. Скӧт пӧвстас жӧ (вӧрад, дерт, сідз) олӧны зэв уна ошъяс. Ӧнӧдз ошъясыд сёйӧмаӧсь нин гырысь скӧт (вӧв да мӧс) дас квайтӧс. Ӧти дӧвалысь сёйӧмаӧсь куим мӧс, сэсся сылӧн и мӧскыс абу кольӧма. Ичӧт челядьыс кузя кӧть тайӧ дӧваыдлы колӧ мӧда-мӧдлы отсасян комитетсянь сетны неыджыд отсӧг, мед эськӧ эз жӧ сійӧ коль дзик мӧстӧг. Отсавтӧгыд, дерт, босьтнытӧ сійӧ оз вермы.