МЫЙ КОЛӦ ТӦДНЫ КООПЕРАТИВСА ШЛЕНЛЫ
Ӧні быд вӧлӧсьтын эм кооператив. Шоч мортыд абу сэні шленын, сетӧма пай, олан кост кӧлуй да сёян-юантортӧ пыр сэсь босьтасьӧ. Веськыда кӧ шуны, ӧні кооперативтӧгыд деревняыдлы не овны. Сӧмын омӧля на жӧ мукӧдлатіыс уджыс сэні артмӧ, сэсся бара жӧ прӧстӧй мортыд он и тӧд, кыдзи-мый сэні уджалӧны, кутшӧма уджсӧ пуктӧма. Шленъясыд кинас шеныштасны — миян пӧ тай со бӧрйӧма, мед уджалӧны войтырыс. Кытсюрӧ кӧ неладнӧ — видыштасны либӧ юрсӧ гыжъялыштасны дай ставыс.
Колӧ эськӧ сідз вӧчны, мед быд кооперативса шлен тӧдӧ вӧлі став уджсӧ, кыдзи да мый сэні ладсӧ пуктӧма. Сэсся мед вермӧ вӧлі ассьыс сӧветсӧ сетны, могсӧ висьтавны, отсавны, индавны. Общественнӧй удж вылад ӧд уна син колӧ. Сэки сӧмын бӧрйӧм йӧзыд вермасны уджсӧ нуны кыдзи йӧзыдлы колӧ.
Ӧні регыд лоӧны кооперативса правленньӧясын бӧрйысьӧмъяс (перевыборы). Пондасны важ удж серти бӧрйӧм йӧз кыв кутны, правленньӧяслы индӧдъяс сетны шленъяс водзын. Сэсся бара жӧ колӧ водзӧ кежлӧ выль правленньӧясӧ да ревизионнӧй комиссияясӧ бӧрйыны вежӧра, уджавны кужысь йӧзӧс. Сэсся ковмас прибыльсӧ, эм кӧ, кужӧмӧн юклыны коланінъясӧ.
Быд шленлы колӧ правленньӧясӧ бӧрйысигӧн ветлыны собранньӧяс вылӧ. Некор оз ков йӧз вылӧ ыстысьны. Медъёна тайӧ удж бердӧ колӧ кутчысьны бабаяслы: на ки пыр ӧд став босьтасьӧмыд мунӧ. Бара жӧ том йӧзлы оз ков кольччыны — найӧ выль ног олӧм лӧсьӧдысьяс, туйсӧ писькӧдысьяс.
Быд собранньӧ вылын колӧ сёрни лэптыны со мыйяс йылысь:
1. Кымынӧд юкӧн крестьянаыс шленӧ пырӧмаӧсь сиктысь? Мыйла мукӧдыс оз пырны? Уна-ӧ пай пуктӧмаӧсь, мыйла помӧдз абу чукӧртӧмаӧсь? Вит шайта пайӧ кооператив петӧма абу на?
2. Ыджыд-ӧ оборот (мый дон вузалӧма тӧвар) вӧчӧма во гӧгӧрӧн керка юрӧ? Кымынӧд юкӧн шӧр нажӧткаысь кооператив пыр мунӧ? Кутшӧм тӧвар оз судзсьы да мыйла? Кысь босьтасьӧны, позьӧ оз кыськӧ донтӧгджык судзӧдны?
3. Кыдзи тӧвар дон лӧсьӧдӧны, уна-ӧ содтӧны босьтӧм дон вылӧ? Обсоюз тшӧктӧ содтыны сӧмын 12%; оз кӧ сідз вӧчны — мый понда? Уна-ӧ рӧскод вӧчӧмаӧсь да мыйяс вылӧ? Оз-ӧ позь вӧлӧм рӧскодсӧ сэсь кытсюрӧ чинтыны?
4. Кутшӧма индӧдъяс сеталӧмаӧсь ревизионнӧй комиссияяс да лавочнӧй комиссияяс? Мый вӧчӧма, мед кутшӧмкӧ гусялӧмъяс либӧ судзсьытӧмъяс уджалысьяслӧн оз ло? Бура-ӧ мунӧ тшӧтӧводство?
5. Уна-ӧ йӧз костын уджйӧз да мыйла оз ӧдйӧджык сійӧс перйыны? Мыйла тӧргуйтӧны уджӧн? Мыйла омӧля шлен понда тӧждысьӧны да ӧткодя пуктӧны босьтасигӧн — шлен кӧть абу.
Колӧ уджсӧ кооперативыдлысь пуктыны шленъяс вӧснаджык. Кымын озыр кооперативыд, унджык пай чукӧртӧма — сымын донтӧмджыка тӧргуйтны позьӧ. Сэсся дыр куйлан тӧвар оз ков чукӧртны, прӧст сьӧм лавкаын оз ков видзны. Тӧргуйтысьясыд колӧ сюсьӧсь, ӧнія кооперативса ладсӧ тӧдысь. Бура уджалысьясӧс, дерт, бара мӧд во кежлӧ колӧ кольны.
Парма.
