АЭРОСТАТ КОМИ МУЫН

Сентябр 13-ӧд лунӧ, 1 часӧн Нювчим завод весьтын верст вылнаын кымын мыччысис аэростат (воздушнӧй шар). Заводсяньыс километр кык сайӧ кымын аэростатыс лэччис муас. Нювчимса йӧз отсӧгӧн аэростат вылас локтысьясыс, Федосеенко да Елифтерьев ёртъяс косялісны (разберитісны) да вайисны Нювчимас. Сэсянь пилотъясыс (аэростат вылас лэбалысьяс) локтісны вӧлӧн Сыктывдінкарӧ, а аэростатсӧ вайисны сэтчӧ пурйӧн.

Миян газетын уджалыськӧд сёрнитігӧн Федосеенко ёрт висьталіс: Сӧвет Союзса Авиахим пӧ вӧчис Ставсоюзса воздухоплавательнӧй состязанньӧ. Состязанньӧ вылас пӧ вӧлі нёль аэростат: ӧти Мӧскуаса Авиахимлӧн, мӧд Рытыв-вой обласьтлӧн, коймӧд Украиналӧн да нёльӧд союзса Авиахимлӧн. Найӧ ставныс лэбзьӧмаӧсь Мӧскуасянь сентябр 12-лунӧ 15-а 18 час костын. Сынӧдӧ кыпӧдчӧм бӧрын найӧс нуӧма тӧлыс асыв-войвылӧ (аэростатыслӧн некутшӧм машина абу. Сійӧ торъя матерйӧысь шар вӧчӧмаӧсь да сынӧдсьыс кокньыдджык газӧн тыртӧмаӧсь шарсӧ. Качӧдчӧм бӧрын кытчӧ тӧв нуӧ, сэтчӧ и мунӧ). Мӧскуасянь петӧмсянь 17 час да 39 минут мысти найӧ воӧмаӧсь Нювчимӧдз. Сэні чардавны кутӧма да, налы лоӧма лэччыны муас.

Тайӧ состязанньӧсӧ вӧчӧмаӧсь, коді вермас медылӧ лэбзьыны. Мукӧд аэростатъясыс кодарӧ да кытчӧ лэбзьӧмаӧсь — оз на тӧдны.