ГӦРД АРМИЯӦ МУНЫСЬЯСЛЫ

Важ салдатӧ мунысь вокъяс

Туплясьӧмӧн бӧрдлісны;

Личкис найӧс ыджыд шогъяс,

Курыд вина юлісны.

Салдатъяслысь пон кодь олӧм

Тӧдӧ вӧлі мунысь морт;

Став лёкторсӧ тӧдіс сьӧлӧм,

Сьӧкыд вӧлі кольны горт.

Кырныш позсӧ сарлысь видзны,

Озыръяслысь озырлун;

Колӧ вӧлі мортӧс дзугны,

Енмӧн сюйны омӧль дум:

Гӧль йӧз вӧсна тільсьысь йӧзӧс

Нем жалиттӧг лыйлыны;

Вины уджалысь бур-вокӧс,

Ас пӧсь вирӧн пӧдтыны.

Гӧрд армияӧ ми ставным

Том йӧз мунам нимкодь пыр;

Тӧдам: колӧ Сӧвет видзны,

Тшӧтшӧдавны кырныш ныр.

Армияын ми велӧдчам

Озыръяскӧд водзсасьны;

Пемыдлунысь ми весасям

Эмбур понда косясьны.

Ныв-зон, босьтлӧ гажа сьывны,

Гора гудӧк паськӧдлӧ!

Кыдзи колӧ выль ног овны

Пемыд йӧзӧс велӧдӧ!

Энӧй шогсьӧ миян вӧсна,

Регыд гортӧ воам бӧр;

Революция меддона —

Сьӧлӧмсянь сувтам сы дор.

Батраков.