МЕНАМ БЫДМӦМ

Уна грездын овлывлі,

Уна сиктӧ ветлывлі;

Уналаӧ пыравлі,

Уна пачысь сёйлывлі.

Коран мешӧк новлывлі,

«Гортъяс» бӧрся котравлі;

Ӧбедняяс сёйлывлі,

«Горт» выв дӧра новлывлі.

Уна йӧрӧд ветлывлі,

Сёркни-кушман сёйлывлі:

Уна йӧзӧс нӧйтлывлі,

Вывті ёна косясьлі.

Рыт-асылыд зэв кӧдзыд,

Омӧль кӧмкот-кышаннад;

Вын-эбӧсыд кынмӧма,

Йӧзӧ пырны он вермы.

Асывводзын котралан,

Пӧсь нянь сёйны корсьысян;

Тшыг кынӧмтӧ он вузав,

Узьӧм бӧрын сёйыштны.

Чуксасян да чуксасян,

Абу некод восьтысьыд;

Омӧль йӧзыд видыштас,

Бур йӧзъясыд лэдзыштлас.

Пырӧм мысти юрбитан,

Пызан сайӧ пуксьыштан,

Шыд-рок сэсся сёйыштан,

Мешӧкысь нянь кыскыштлан.

Сёйыштан да юыштан,

Лун-мӧд сэсся олыштан;

Бара сиктӧд ветлыштан,

Тшыг кынӧмтӧ пӧткӧдан.

Энӧ, ёртъяс, дивитӧй

Тайӧ менсьым гижӧмсӧ;

Тшыг кынӧм пӧткӧдӧмсӧ,

Мый ме ёна корлывлі.

Бур йӧз костын ветлывлі,

Лёк йӧз костын овлывлі;

Аслым ӧні кызь арӧс,

Тадзик и ме быдмышті.

Ӧні ог нин корны пет,

Мешӧкаысь эн полӧй!..

Кыдзи водзын котравлі,

Важсӧ лоӧ казьтывны.

Ӧ. Г. Липин