ПЛУГЪЯС БУРӦСЬ

Висер вӧлӧсьтын (Кулӧмдін у.) удждысян тӧвариществоӧ вӧлі вайлӧмаӧсь плугъяс видлӧг вылӧ. Видлалӧм бӧрын крестьяна зэв ёна видчисны, прӧста пӧ сьӧм воштісны.

Плугъяс зэв дыр куйлісны, некод оз ньӧб. Но таво казялӧмаӧсь, мый плугъяс зэв бурӧсь, да босьталісны мырддьысьӧмӧн. Уналы эз тырмы да, асьныс лэччылісны Шойнатыӧдз да Сыктывдінкарӧдз. Мӧд во кежлӧ ставыс кӧсйӧны лӧсьӧдны плугъяс. Тӧвариществолы колӧ заптысьны плугъяснад.

Дедов.