КЫДЗИ ВИДЗӦНЫ КРАСНӦЙ АРМИЯЫН

Уна призывник юалӧ — кыдзи овсьӧ Краснӧй армияын? Овны сэн лӧсьыд. Воысь воӧ лӧсьыдмӧ олӧмыс сэні. Став олӧм республикаын кыптӧ, сы понда кыптӧ и армияын. Вот ӧні кыдзи сэн вердӧны: сетсьӧ 2½ тув нянь, яй — тув джын, шыдӧс — 32 зӧлӧтник, вый (мӧс вый) — 8 зӧл., а кӧнтусь вый кӧ — 12 зӧл., сакар — 8 зӧл., уль овощи — тув, кос кӧ сійӧ — 4 зӧл. Шыд пиӧ пуктыны еджыд пызь 4 зӧл. Сов 7 зӧл., чай ½ зӧл., сэсся ещӧ лаврӧвӧй лист да переч. Ставыс тайӧ лун кежлӧ. Лунся сетанторъяс сёйныс ставыс лоӧ 3012 калория — сетӧны сы мында, мыйта колӧ мортлы, мед сійӧ ёнмӧ век.

Паськӧм йылысь кӧ висьтавны, позьӧ аддзыны сэтшӧмтор: сетӧны шынель кык во кежлӧ, ботинки пара 8 тӧлысь кежлӧ; улыс гач во кежлӧ нёльӧс, улыс дӧрӧм во кежлӧ куимӧс, сэсся кык гожся гимнастёрка да шаровары сетсьӧ во кежлӧ и шоныд дӧрӧм кык во кежлӧ. Тайӧ медглавнӧйторъясыс, эмӧсь ещӧ и посниторъяс, кодӧс сеталӧны жӧ армеечлы. Та серти быдӧн аддзӧ, мый служитны армияын лӧсьыд: вердӧны, пасьтӧдӧны лӧсьыда. Бара жӧ, мӧд ногӧн кӧ, армияад зэв лӧсьыд, ӧти час весиг прӧста оз вош, велӧдӧны сэні унаторйӧ: военнӧйӧ да, и кыдзи овны; а он кӧ куж лыддьысьны да гижны, и сэтчӧ сэн велӧдасны. Красноармеечыд ачыс ёна кутчысьӧ велӧдчӧмас и сьӧлӧмсьыс найӧ уджалӧны, сы понда и гортас найӧ воӧны збойӧсьджык, вежӧраӧсьджык. Армияыд дзик школа кодь. Вот сэтчӧ и мӧдӧдчӧ призывник 1904 вося таво во вылын.

Военнӧй