ИЗ ШОМ ПЕРЙЫСЬ РАБОЧӦЙЯС ЧОРЫДА СУЛАЛӦНЫ

Мӧскуа. Сентябр 5-ӧд лунӧ Ленинградсянь Мӧскуаӧ воисны англияса из шом перйысь рабочӧйяслӧн да германияса рабочӧйяслӧн делегацияяс. Вокзал вылас налы паныд петалісны рабочӧйяс да роботничаяс мӧскуаса пабрик-заводъяс вылысь. Из шом перйысь рабочӧйяс Союзса Исполкомсьыс шленъяс Смит да Ленхет висьталісны газетӧ гижысьяслы: став Сӧвет республикаса рабочӧйясӧн ыстӧм сьӧмсӧ юклім районъясын из шом перйысь рабочӧйяс союз шленъяс костын. Став из шом перйысь рабочӧйяс Англияын ӧні тӧдӧны, мый сӧмын тайӧ отсӧгӧн мынӧны найӧ тшыг кулӧмысь дай вермасны венны капиталистъясӧс тайӧ косьын. Англияса рабочӧйяс ещӧ на чорыда йитчасны Сӧвет республикаса рабочӧйяскӧд, эськӧ Англияса правительствоыс и ёна зільӧ паныд сувтны да. Миллион из шом перйысь рабочӧй чорыда сулалӧны из гӧра моз, оз сетчыны капиталистъяслы.