НЫВБАБАЯС КОНФЕРЕНЦИЯ ВЫЛӦ!

Ленин ёрт ыджыд надея вӧлі пуктӧ нывбаба удж вылӧ, сійӧ пыр шуліс: нывбабаястӧг пӧ бур олӧм не вӧчлыны. Мед пӧ весиг быд слуга, пач водз дорын уджалысь велаліс сӧвет удж нуӧдны.

Со кыдзи нывбабаяс вылӧ видзӧдіс Ленин ёрт. Октябрса революция бӧрын коми нывбабаяс тшӧтш заводитісны лӧсьӧдны выль олӧм. 1924 воӧ бӧрйӧм удж вылын уджалісны 68 нывбаба, 1925 воӧ — 301, а таво 850 кымын нывбаба, на пиысь 200 морт уджалӧны сӧветъясын, 550 морт нарзаседательын, мукӧдыс сэсся уджалӧны кооперативъясын, мӧда-мӧдлы отсасян комитетъясын да мукӧдлаын.

Воысь воӧ нывбабаяс век ёнджыка матыстчӧны общественнӧй удж дінӧ. Сӧмын коми нывбабаяслы торкӧ кутчысьны общественнӧй удж бердӧ налӧн пемыдлуныс. Колӧ войдӧр найӧс босьтчыны югдӧдны, ӧтвылысь бырӧдны налысь велӧдчытӧмсӧ. Сӧвет власьт ёна тӧждысьӧ пемыдлунсӧ бырӧдӧм йылысь, ёна тӧждысьӧ и нывбабаясӧс югдӧдӧм йылысь. Став республика пасьта ӧні уджалӧны нывбабаяс костын делегатскӧй собранньӧяс. Миян Коми обласьт пасьта ӧні уджалӧны 70 делегатскӧй собранньӧ, кытчӧ волывлӧны 2058 делегатка. Делегатскӧй собранньӧяс пыр нывбабаяс велӧдчӧны уджавны сӧветъясын, кооперативъясын да мукӧд учрежденньӧясын. Сідз воысь воӧ нывбабаяс чорыдджыка босьтчӧны общественнӧй удж бердӧ.

Медым тӧдмавны нывбабаяслысь общественнӧй уджсӧ да водзӧ кежлӧ лӧсьӧдны план, нывбабаяс костын удж нуӧдан обласьтувса юкӧд сентябр тӧлысьын 20–23 лунӧ Сыктывдінкарын чукӧртӧ беспартийнӧй нывбабаяслӧн 2-ӧд обласьтувса конференция.

Нывбабаяс конференция вылӧ колӧ быд вӧлӧсьтысь, быд уездысь мӧдӧдавны сюсьджык нывбабаясӧс, выборнӧй удж вылын уджалысьясӧс (сӧветъясын, кооперативъясын, нарзаседательын, мӧда-мӧдлы отсасян комитетъясын уджалысьясӧс).

Конференция бӧрын коми нывбабаяс ещӧ ёнджыка босьтчасны общественнӧй удж бердӧ, лӧсьӧдны выль олӧм.