ПОВОДДЯ СЕРАЛӦ

Коймӧд лун нин мича луныс!..

Кирӧ Ларӧ куртны муніс;

Тадзи шуис Кирӧвичыд:

«Арся „гожӧм“ пуксис мича,

Эз кӧ ӧнӧдз турун тшык —

Скӧтӧй менам оз ло тшыг...

Прокопейсянь турун куйлӧ,

Куртны-чӧвтны эз на туйлы;

Таво лои бӧра пӧра,

Босьтча страдуйтны зэв скӧра,

Турун лоӧ, майбыр, веж —

Тужа-нужа, бокӧ кеж!..»

Сёрмин, сёрмин, Кирӧ Ларӧ:

Он нин пуктысь арся «жарӧн»;

Воши таво страдна пӧра,

Пуктысян кад коли бӧрӧ,

Мӧд пӧв сійӧ оз нин во —

Веж туруныд оз нин ло...

Чарла босьтіс Петыр Пекла.

Вундыны пӧ, шуӧ, ветла.

Муяс вылысь няньяс видліс,

Гоз-мӧд шепъяс сюлысь, идлысь:

«Гожӧмбыд ӧд шливгис зэр —

Нянь тусьыс тай зэв на нэр...

Вунда сёрӧнджык на арнас —

Няньыд воас татшӧм „жарнас“»...

Оз нин, Пекла, няньыд волы —

Кисьман-воан кадыд коли:

Кыкысь вӧлі пужъя вой —

Кынмӧм няньыд оз нин во...

Йӧзлы таво ёна инмис:

Турун сісьмис, няньыд кынмис...

Бур йӧз, таво нянь да турун

Энӧ видзӧй кыдзисюрӧ,

Медым тшыгъявны оз ло —

Ковмас вуджны сьӧкыд во!