МИЯН ПРАЗДНИК (МЮД)

Бара сувтас став му вылысь

Праздник улӧ томулов,

Гӧрд флаг лэптас бара выльысь,

Тайӧ праздник чӧв оз ов.

Том йӧз видлас тайӧ лунӧ —

Ки-кок абу ӧні кын, —

Кыдзи гӧрд флаг водзӧ нуӧ,

Кыдзи содӧ миян вын.

Кыдзи гажа шонді петӧ —

Петам паськыд туйӧ ми;

Воысь воӧ юрсӧ лэптӧ,

Уджалысьлӧн садьмӧ пи.

Коми том йӧз сідзжӧ садьмӧ,

Садьмӧ крестьяналӧн пи;

Мывкыд вежӧр налӧн содмӧ,

Ёнмӧ воысь воӧ ки.

Водзӧ мунӧ коми войтыр,

Паськыд туйӧ петӧ пыр;

Комсомоллӧн быдмӧ котыр,

Озыр йӧзлӧн чегӧ ныр.

Лёка олӧм кольӧ ылӧ,

Став том йӧз, кок йылӧ сувт;

Гӧрд флаг лэпты пыр тэ вылӧ,

Чорыда зэв киад кут.

Пармаысь регыд нин петан,

Огӧ нин олӧ сэн дыр;

Ленинизм знамя пыр кутам,

Мед сійӧ дзирдалас пыр.