ВРАЧЛӦН ТУЙДӦМЪЯС

Венерикъяслы колӧ лечитчыны

Август тӧлысьын 23 лунӧ Сыктывдінкарын воссис выль пӧлӧс лечитанін, коді шусьӧ венерическӧй диспансерӧн. Диспансер ас водзас пуктӧ сэтшӧм могъяс: отсавны прамӧя, бура висьысьяслы, босьтны лыд вылӧ венерикъясӧс. Венерическӧй висьӧмъясӧн шусьӧны: сифилис, триппер да шанкр. Лыд вылӧ босьтӧм мысти диспансер пондас дӧзьӧритны, медым висьысьяс бура лечитчисны бурдтӧдзыс.

Венерическӧй висьӧмъяс медся ёнасӧ паськалӧны каръясын. Сэтӧні йӧзыд вывті уна. Том нывъяс-зонъяс олӧны (узьлӧны) кодкӧд веськалӧ. Висьӧмыд медся ёнасӧ вуджӧ узьлігӧн. Ӧти мортсянь, коді асьсӧ оз лечит, висьӧмыд вермас паськавны зэв уналы. Узьлӧм пыр кындзи, висьӧмыс паськалӧ окасьӧмӧн, висьысь мортлысь чигарка пом куритігӧн, висьыськӧд ӧти дозйысь сёйӧмӧн.

Та вӧсна диспансер ас водзас пуктӧ удж: заводитны косясьны узьлӧм пыр висьӧм паськӧдӧмкӧд. Диспансер пондас йӧз пӧвстын лыддьыны лекцияяс, лӧсьӧдавны выставкаяс и сідз водзӧ. Медым висьӧмыс оз паськав, диспансер пондас видлавны нӧшта висьысь войтырлысь семьянысӧ. Таысь кындзи, пондасны тӧдмавны став оласногсӧ висьысьяслысь, висьтавлыны налы асьсӧ дӧзьӧритӧм йылысь.

Йӧз пӧвстын сёрнитӧны, тайӧ висьӧмъяс пӧ бырӧдны (лечитны) оз позь. Сифилисӧс шуӧны «лёквисьӧмӧн». Сёрнитӧмыс тайӧ весьшӧрӧ. Быдсяма висьӧм бырӧдны позьӧ. Сӧмын колӧ заводитны лечитчыны пырысьтӧм-пыр. Оз ков яндысьны сыысь. Он кӧ понды лечитчыны, висьӧм паськалас ёна.

Сифилис кокньыда лечитӧны, кутшӧма и мукӧд пӧлӧс вуджан висьӧмъясӧс, шуам кӧть: колера, чакотка и мукӧд. Висьысьяслы колӧ овны врач индалӧм серти, видзны асьтӧ, медым оз вермы висьӧмыс паськавны йӧз вылӧ.

Оз ков вунӧдны: ӧти висьысь мортӧс лечитӧмӧн уна войтырӧс мездан висьӧмысь. Быд вежӧра мортлы, кодлы дона олӧмыс аслас и йӧзыслӧн, колӧ отсавны диспансерлы. Колӧ став йӧзыслӧн кутчысьны сифилис да мукӧд пӧлӧс вуджан висьӧмъяс бырӧдан удж дінӧ. Висьысь войтырлы пырысьтӧм-пыр колӧ волыны диспансерӧ либӧ аслас районувса больничаӧ.

Сӧмын зіля кутчысьӧмӧн, мода-мӧдлы отсалӧмӧн диспансер вермас паськӧдны бура йӧз пӧвстӧ удж. Ставнымлӧн колӧ кутчысьны венерическӧй висьӧмъяс бырӧдӧм вылӧ. Оз ков вунӧдны: ӧти висьысь мортсянь вермасны висьмыны быдса семьяяс, быдса сиктъяс.

Врач И. Коканин.