ОВМӦС БУРМӦДӦНЫ

Кӧсйӧны му уджалан машинаяс судзӧдны.

Кор агроном сёрнитіс Ертомса крестьянакӧд кӧйдыс весалӧм йылысь, сылы мужикъяс шуисны — «джын кӧйдысыс весалӧмнад вошӧ; миян сідз нин этша няньным — пондам, дерт, шыблавны кӧйдыс.» Сэки агроном висьталіс машинаӧн кӧдзӧм йылысь. Машинаӧн пӧ кӧйдыс мунӧ этша. Ӧткымын водзмӧстчысь крестьяна весавлісны нин кӧйдыснысӧ, найӧ жӧ судзӧдісны кӧдзан машина. Киӧн кӧдзигӧн миянын десятина му вылӧ кӧдзӧны 24 кымын пуд ид. Машинанад кӧдзӧмӧн муніс пуд 10−12 десятина вылӧ сӧмын. Аддзӧны эськӧ вӧлі крестьяна, кутшӧм этша кӧйдыс мунӧ, да машинаӧн кӧдзны лысьтісны зэв на этшаӧн, видзӧдлам пӧ, кутшӧм петасъяс лоасны. Машинаӧн кӧдзӧм муяс вылын ӧзим ньӧти эз ло шочджык киӧн кӧдзӧм муяс дорысь. Юнь тӧлысьын киӧн кӧдзӧма муяс вылын зэртӧмла ӧзим прамӧя тшыкліс, а машинаӧн кӧдзӧминъясын нинӧм эз лолы. Медмичаа петіс машинаӧн кӧдзӧм пыш. Кинад кӧдзӧминысь катша-рака вӧлі став кӧнтусьсӧ кокалӧмаӧсь. Ӧні крестьяна аддзӧны машинаӧн кӧдзӧмлысь бурсӧ. Машина лӧсьӧдны крестьяналы позьӧ зэв кокньыда. Нёль-ӧ-вит крестьянин кӧ ӧтувтчасны, машина ӧти гожӧмӧн асьсӧ вештас. Машина джын кӧйдыссӧ вичмӧдӧ. Десятина 5−6 кӧ кӧдзан, кӧдзан машина доныд кӧйдыс лишалас ӧти воӧн. Этшаджык муясалы позьӧ ӧтувтчыны керка 8−10-лы. Ертомса крестьяна мӧд во кежлӧ унаӧн лӧсьӧдчӧны судзӧдны кӧдзан машинаяс, колян вося моз оз нин повны кӧйдыс весалӧмысь ни машинаӧн кӧдзӧмысь.

Ертомса Ӧ. П.