ЮАЛӦМ — ВИСЬТАЛӦМ СЕЛЬХОЗНАЛОГ ЙЫЛЫСЬ
Крестьяна, газет пыр юалӧ, мый онӧ тӧдӧ.
1. Кыдзи кутасны таво мездыссьыны сельхозналогысь этша едока кӧзяйствояс? Обисполком гижӧм серти Коми сикт газетӧ 28 номерӧ гижӧма — Пезмӧгса вӧлӧсьтын пӧ татшӧм кӧзяйствосьыс мездыссьӧ, доходыс кӧ абу 100 шайтысь унджык. Мездыссьӧ оз мукӧд вӧлӧсьтас та моз жӧ?
Этша едока кӧзяйствояс мездыссьӧ необлагаемӧй минимум кузя. Сійӧ минимумыс пуктӧма быд вӧлӧсьтлы кык: едок вылӧ да кӧзяйство вылӧ. Кӧзяйство вылас пуктӧм минимумыс дорйӧ (мездӧ) этша едока кӧзяйствоястӧ. Шуам, кутшӧм-нибудь вӧлӧсьтын пуктӧма минимумсӧ 32 шайт едок вылӧ да 95 шайт кӧзяйство вылӧ. Иван Ракинлӧн кӧзяйствоас кык едок, вогӧгӧрся доходсӧ лыддьӧмаӧсь 94 шайт. Тайӧ кӧзяйствоас кӧть ӧти едок вылас усьӧ доходыс 47 шайт, налогсӧ оз пуктыны сы понда, мый став кӧзяйство вылас доходыс оз кай кӧзяйствоса необлагаемӧй минимумсьыс вылӧджык. Сідзи став вӧлӧсьт кузяыс кутасны мездыссьыны этша едока кӧзяйствояс.
2. Кор миян вӧлі бӧрйӧма ас деревняысь налогӧвӧй комиссияӧ мортӧс, сэк вӧлі став рӧскод да нажӧтка арталӧмӧн лоӧма миянлы налог 38 шайт, сы бӧрын ӧні исполком шуӧ — 51 шайт. Мыйла сійӧ исполкомыс закон серти оз вӧч?
Налог таво пуктыссьӧ доход серти: унджык кӧ доход, унджык и налог. Доходыс лыддьыссьӧ видз-муысь, да скӧтысь, да бокиса нажӧткаысь. Видз-мусӧ да скӧтсӧ лыдӧ босьтӧны кӧзяин висьталӧм серти. Бокиса нажӧтка йывсьыс кӧть юалӧны жӧ кӧзяинтӧ, да помалӧмӧн (окончательно) сэтысь доходсӧ пуктӧ вӧлӧсьтувса налогӧвӧй комиссия, сійӧ комиссияас эм сиктса бӧрйӧм шлен. Волисполком ӧтнас татӧн нинӧм оз вермы вӧчны. Кодлы оз правильнӧ кажитчы налог пуктӧмыс, сійӧ вермас сетны норасьӧм вӧлӧсьтувса комиссияӧ тӧлысь тыртӧдз окладнӧй лист сетӧм бӧрас, сы бӧрын уездувса комиссиялы.
3. Ми перъям видз-му зэв сьӧкыда сьӧд вӧрысь; сійӧ вӧчныс дыр тырмӧ, доходсӧ зэв дыр оз сет. Налогсӧ выль видз-му вылас пуктӧны ӧткодя мукӧд важ видз-муяскӧд. Ладнӧ-абу тайӧ?
Налог пуктан закон кузяыс, кокньӧд сетсьӧ сӧмын выль местаӧ петысьяслы, кытӧн колӧ ёна мырсьыны видз-му бердын. Коді сиктъясын олӧ, налы выль видз-муысь кокньӧд законыс оз висьтав. Ёна кӧ омӧль выль видз-муыс, вӧлӧсьтувса налогӧвӧй комиссия вермас сэтшӧм кӧзяйствоясыслы ичӧтджыка лыддьыны бокиса нажӧткаяссӧ.
А. Щет.
