ВИДЗӦЙ СЬӦМНЫТӦ СЬӦМ ЧӦЖАН КАССАЯСЫН

1922 во помын Сӧветскӧй власьт лэдзис декрет восьтавны уджалысь йӧзлы сьӧм чӧжан кассаяс. Медвойдӧр сэтшӧм кассаяссӧ восьталісны гырысь карын. Недыр мысти государственнӧй сьӧм чӧжан кассаяс лоины став Союзнӧй республикаяс пасьтаын.

Сьӧм чӧжан кассаястӧ восьталӧма каръясын, вӧлӧсьтъясын — пошта-телеграф учрежденньӧяс бердӧ, кӧрт туй станцияясын, пабрик-заводъясын. Крестьяналы медматын сьӧм чӧжан касса — пошта-телеграф учрежденньӧяс бердын.

Миян обласьт пасьтаын 41, на пиысь 35 — пошта-телеграф учрежденньӧяс бердын, 5 — финанс учрежденньӧяс бердын и 1 — банк бердын.

Сьӧм пуктыссьӧ срокӧн и сроктӧг. Сроктӧг пуктӧмӧн сьӧмыс во гӧгӧрнас быд шайтысь локтӧ доход, прӧчент шайтысь — 9 ур. Сё шайтысь — 9 шайт. Срокӧн пуктӧм сьӧмыс быд шайтысь — 8 ур. Сё шайтысь — 8 шайт. Кассаӧ пуктӧм сьӧм сідзжӧ отсалас Сӧвет правительстволы ньӧбавны тракторъяс, нуӧдны сиктъясӧ электричество, восьтавны да бурмӧдны удж пабрик-заводъясын.

Кассаясын сьӧм видзӧмысь повны немтор. Правительство ачыс дӧзьӧритӧ, медым пуктӧм сьӧмъяс эз вошны. Пуктӧм сьӧм сідзжӧ некод оз вермы арестуйтны ни мырддьыны. Сьӧм видзсьӧ гусьӧн. Сы йылысь тӧдӧ сӧмын ачыс пуктысьыс.