КӦЙДЫС ЛӦСЬӦДӦМ ВӦСНА КОЛӦ АРСЯНЬ ТӦЖДЫСЬНЫ

Таво зэра гожӧм вӧсна няньяс зэв ньӧжйӧ воӧны. Уналаын идъяс вывті вежӧсь. Ӧткымынлаын таво бура оз нин вевъяв вонысӧ. Мукӧдлаас ид быдтасъясыд, ме чайта, кынмисны нин. Сэтшӧминас ид кӧйдысъяс оз нин ло асланыс, кыськӧ ковмас босьтны. Бокысь босьтӧм, ылысь вайӧм роч кӧйдысыд бурыс зэв шоча сюрлывлӧ. Кыдзкӧ колӧ аслыд жӧ кӧйдыстӧ лӧсьӧдны. Бӧръя вояснас уна крестьяна лёк кӧйдыс вӧсна колины няньтӧмӧсь. Босьтасны вӧлі тулысын зэв гырысь туся ид кӧйдыс бур пыдди, а сійӧ сюрӧ чужтӧм, зэв ёга. Мукӧддырйиыс кӧйдысыс мича дай чужӧ, сӧмын сёрӧн воӧм вӧснаыс гожӧм помнас кынмӧ. Ӧні аддзан, мый эмӧсь вывті веж, вотӧм идъяс. Сэні жӧ мукӧдыс дзикӧдз нин воӧма. Тайӧ воӧмджык идъяс вӧлӧма воддза кӧдзӧм. Эмӧсь муяс, кытчӧ кӧдзӧма медводз, сӧмын идйыс дзикӧдз на веж. Тайӧ муясыс кӧдзӧма роч, ылысь вайӧм кӧйдысӧн. Уналаын роч, бокысь вайӧм идъяс кӧйдысӧдз оз вермыны воны. Медся бур, медся надейнӧй кӧйдыс — асланым — татчӧс кӧйдыс, сю кӧть ид — ӧткодь.

Миян ӧнісянь колӧ заводитны тӧждысьны кӧйдыс перйӧм понда. Бурджыка воӧм ид муяс либӧ сю муяс мича поводдя дырйи колӧ регыдджыка вундыны.

Вундӧм мыстиыс кольтаяссӧ мича поводдяӧн колӧ вежон кымын чумалиясын либӧ ӧшлӧмӧн потшъяс вылын косьтыны. Тэчасӧ кольтаяс пуктыны бурджыка, медым оз торксьы, оз баксяв. Рынышын оз ков вывті ёна косьтыны, мед чужанлуныс кӧйдыслӧн эз вош. Вывті косьмӧм понда лоӧ повны йирка рынышъясын. Коми йирктӧм рынышъясын кӧйдыс оз пов вывті ёна косьмӧмысь.

Вартӧм мысти пырысьтӧм-пыр кӧйдыс колӧ весавны (сортируйтны). Став гырысь да сьӧкыд тусьяссӧ босьтны кӧйдыс вылӧ, а поснисӧ сӧмын кольны сёян вылӧ.

Таво этшалаын няня быдтасъяс воасны бура. А кӧні бура воасны, колӧ медвойдӧр перйыны кӧйдысъяс. Сёян вылад, ас няньыд оз кӧ тырмы, позьӧ бокиса ньӧбӧм нянь вайны. Вайӧм кӧйдыс вылад надейтчыны оз позь.

Кӧйдыс судзӧдӧм вӧсна медсясӧ колӧ мӧвпыштны кооперативъяслы. Оз ков сёрмыны кӧйдыс лӧсьӧдӧм уджӧн. Кӧйдыстӧминъясса кооперативъяс мед тшӧктісны кӧйдысаинъясса кооперативъяслы арсянь чукӧртны мыйта колӧ налы кӧйдыс. Сельпромкредитсоюз, Сельхозбанк да Обсоюз мед сетісны войтырӧс да сьӧм кӧйдыс лӧсьӧдӧм вылас. Землеуправленньӧяс мед отсаласны агрономъясӧн. Ӧнісянь кӧ пондасны ӧтувтчӧмӧн уджавны, ас кӧйдыстӧг кольӧмысь немтор повны. Тулысӧдз кӧ тайӧ уджнас эновтчам, бара жӧ ас кӧйдыстӧм колям.

Крестьянин, эн вунӧд кӧйдыс лӧсьӧдӧм вӧснаыд. Воддза воясӧ эн ӧмӧй нин тэ велав, мый ылысь вайӧм роч кӧйдыс сувтӧ вывті дона.

В. ИСАКОВ.