АНГЛИЯСА НЕЗАВИСИМӦЙ РАБОЧӦЙ ПАРТИЯЛӦН ВОЗЗВАННЬӦ

Выль война кыпӧдӧмлы рабочӧйяс сувтасны паныд.

ЛОНДОН. Англияса независимӧй рабочӧй партия разӧдӧма воззванньӧ. Сійӧ воззванньӧыс индӧ: англияса правительство кӧ пӧ татшӧм политика кутас нуӧдны водзӧ, Польшаын вермас пӧ бара кыптыны война. Литваын да Сӧвет республикаясын олысь йӧз, гижӧма воззванньӧас, шуӧны, Пилсудскӧй пӧ лӧсьӧдчӧ панны война Литвакӧд англияса мукӧд государствояс кост удж нуӧдысь министерство тӧдӧмӧн. Польшаыс кӧ заводитас война Литвакӧд либӧ мукӧд ног кутас зэлӧдны Литвасӧ, Сӧвет республикалы тшӧтш лоӧ сэтчӧ сюйсьыны; Литвасӧ венӧм бӧрын Польшаыс заводитас воны Сӧвет республика вылас. Сы вӧсна пыр вермас кыптыны война. Войнаыс кӧ лоӧ, заводитасны воюйтны тшӧтш мукӧд государствояс. Сэки бара вермас лоны Став европаса война. Англияса независимӧй рабочӧй партия тшӧктӧ, мед рабочӧйяс сюся видзӧдасны та бӧрся да мед сэсся висьталасны англияса правительствоыслы, мый англияса правительствоыс кӧ оружйӧ кутас Польшалы ыставны, война кӧ кутас зільны панны, рабочӧйяс ставныс сувтасны паныд.