СОЮЗ РЕСПУБЛИКАЛӦН ДОХОДЪЯС

1925−26 вося бюджет арталӧма 4 миллиард шайт вылӧ.

Союзса Центральнӧй Исполнительнӧй Комитетлӧн бӧръя сессия арталӧма да вынсьӧдӧма Союз республикалысь 1925−26 во кежлӧ бюджетсӧ 4 миллиард 39 миллион шайт.

Тавося бюджетлӧн содӧмыс лои став республикаса овмӧс кыпӧдӧм вӧсна. Сы вӧсна жӧ таво неналогӧвӧй доходыс унджык налогӧвӧй доходся; кӧрт туйяс, пошта, пабрик-заводъяс сетӧны таво государстволы ыджыдджык доход. Сэсся 1925−26 вося бюджет арталӧма дефициттӧг, 118 миллион шайт. Доходыс рӧскодсяыс унджык.

Кутшӧм доходъясысь арталӧма бюджет?

Неналогӧвӧй доходъяс.

Медводдза местаын тавося бюджетын сулалӧны неналогӧвӧй доходъяс. Неналогӧвӧй доходъяс арталӧма 1 миллиард 988 миллион шайт вылӧ.

Медыджыд неналогӧвӧй доход сетӧны кӧрт туйяс — 1 миллиард 345 миллион шайт. Мӧйму кӧрт туйяслӧн доход вӧлі ставнас кольӧма туйяс лӧсьӧдӧм вылӧ, таво 16 миллион шайт воӧ нин казнаӧ чистӧй доход.

Сэсся 13 миллион шайт сетӧ государстволы пошта.

Пабрик-заводъяс тӧргуйтӧм сетіс государстволы 214 миллион шайт. Вӧр доход арталӧма 140 миллион шайт вылӧ да мукӧд пӧлӧс доходъяс 135 миллион шайт.

Налогъяс.

Медуна доход сетӧны косвеннӧй налогъяс: 1 миллиард 127 миллион шайт. Крестьяналӧн да рабочӧйяслӧн олӧм бурмӧм вӧсна содісны тайӧ доходъяс 91 прӧчент вылӧ мӧймуся во серти.

Веськыд (прямые) налогъяс чукӧрмас 583 миллион 500 сюрс шайт, на пиысь 340 миллион прӧмыслӧвӧй да подоходнӧй налог сетӧ, да 234 миллион шайт сельхозналог. Мӧймуся во серти подоходнӧй налог содӧма 56 миллион шайт вылӧ, сельхозналог чинӧма 100 миллион шайт вылӧ.

Заёмъяссьыс доходъяс.

Заёмъяс сетӧны государстволы 120 миллион шайт доход. Крестьяналӧн, рабочӧйяслӧн олӧм бурмӧм вӧсна чукӧрмис кырымас тырыс сьӧм, прӧста куйлӧ, некутшӧм пӧльза сэсь некодлы оз ло, государство сэтшӧм сьӧмсӧ чукӧртӧ уджйӧзӧн да видзӧ овмӧс кыпӧдӧм вылӧ. Сідзнад крестьяналы рабочӧйяскӧд пӧльза дай государстволы тшӧтш.