ЛӦСЬӦДЧӦЙ ПРИЗЫВ КЕЖЛӦ

Регыд воас призывникъяслы мунан лун приём вылӧ. Мый йылысь колӧ думыштны налы и став коми йӧзлы сы водзын? Колян вояс призыв дырйи эз ставыс лӧсьыда да шыльыда мунны; позьӧ вӧлі аддзыны сэтшӧмторъяс: став призывникыс да йӧзыс пӧшти сійӧ пӧраӧ юӧны вина да самӧкур.

Призывникъясыс юӧны сійӧн, мый гортысь пӧ дыр кежлӧ мунам да кутшӧм на пӧ сэн, армияад, лоас ещӧ олӧмыд. Йӧзыс на бӧрся юӧны, кӧсйӧны петкӧдлыны тшӧтш ассьыныс шогсьӧмсӧ. Тадзи вӧчны оз позь. Армияад нуӧны оз дыр кежлӧ, сӧмын кык во кежлӧ, а бура кӧ служитан да кутан велӧдчыны, ещӧ водзджык на лэдзасны, ӧти воӧн вермасны лэдзны. Сэсся армияад сетасны уна буртор: велӧдасны грамотаӧ, велӧдасны, кыдзи уджавны овмӧс кыпӧдан туйӧд, кыдзи видзны уджалысь йӧзлысь шы ни тӧв олӧмсӧ. Некутшӧм шог армияӧ мунӧмысь абу, дай юӧмыс зэв омӧльтор. Сӧмын вермас лоны: кось, доймӧмъяс, жугласьӧмъяс. Татшӧм лёк туйӧд ми огӧ вермӧ мунны. Ӧти код морт мед оз ло призыв дырйи, колӧ шуны ставнымлы, и ставнымлы жӧ мӧда-мӧдӧс кутны юӧмысь.

Сэсся мукӧд призывникъяс сёрмӧны локны призыв вылӧ да мӧдӧдчӧм кежлӧ. Сы понда командасӧ чукӧртны сьӧкыд. Мукӧдыс и туй вылас на торйӧдчас да гортас ветлас, шуас: «Суа на ӧд партиятӧ». Дырджык олас да, сэсся оз и су, муннысӧ оз куж. Сійӧс кутасны лыддьыны дезертирӧн да и нокны заводитасны.

Колӧ быд призывниклы гӧгӧрвоны, мый сійӧ мыжыс оз сӧв сӧмын отнас вылӧ, сӧлас тшӧтш семья вылас. Сійӧ семействолы некутшӧм льгота оз сетны, а асьсӧ судитасны 81 ст. Уг. Кодекс серти.

Тані жӧ ми шуам кыв став йӧзыслы, учрежденньӧяслы отсалӧм йылысь. Колӧ отсавны гӧль призывникъяслы: налӧн, колӧкӧ, няньыс муннысӧ абу. Вӧвтӧм призывникъяслы колӧ отсавны вӧла йӧзлы нуны налысь котомкаяссӧ. Колӧ сідзжӧ отсавны гортсаыслы, мед овмӧсыс налӧн оз омӧльтчы. Тайӧ уджӧ колӧ быдӧнлы кутчысьны ёна.