ВЫЛЬ ШКОЛА

Республика пытшкӧсса Овмӧс Нуӧдан юкӧд Обласьтувса Войтырӧс велӧдан Юкӧдӧс юӧртіс выль школа восьтӧм йылысь. Сійӧ школаын сідзжӧ кутасны велӧдны лыддьысьны, гижны, тӧдмавны йӧзкостса олӧм. Таысь кындзи, кутасны велӧдны ремеслӧясӧ: шом сотны, сир вӧчны да скипидар вийӧдны. Велӧдны кутасны куим во. Тайӧ школа ёна нин коліс коми йӧзлы. Школаысь кутасны петны бур ремесленникъяс, ӧтувйӧн овмӧс лӧсьӧдысьяс.

Школаӧ босьтӧны том йӧзӧс 13 арӧссянь, кодъяс войдӧр велӧдчисны ичӧт школаын 3 классын, кужӧны лӧсьыда лыддьысьны, гижны да тшӧтайтны. Таво босьтасны 30 мортӧс. Обласьтувса Исполком шуис школасӧ восьтыны Уллянаӧ. Кор воссяс школаыс, дзикӧдзсӧ ог на тӧдӧ, но лӧсьӧдчам восьса ваӧн на восьтыны.

Коді кӧсйӧ пырны тайӧ велӧдчанінӧ, колӧ сетны шыӧдчӧм аслас Уездувса Войтырӧс Велӧдан Юкӧдӧ. Шыӧдчӧм дінӧ пуктыны документъяс: арлыд йылысь, велӧдчӧм йылысь, овмӧс йылысь. Войтырӧс Велӧдан Юкӧд юӧртас, босьтасны оз школаӧ и кор кежлӧ ковмас мунны.

Кымын да гырысь-ӧ лоӧ стипендия — оз на тӧдны; дерт, мыйтакӧ лоас.

Теров.