МЫЙ ШУИС КАПП-лӧн МЕДВОДДЗА КОНФЕРЕНЦИЯ
Надеев ёрт доклад серти (КАПП лӧсьӧдӧм йылысь, ӧнӧдз уджалӧм йылысь да водзӧ уджъяс йылысь) КАПП-лӧн медводдза конференция шуис:
1) Выль олӧмлань тувччалігӧн, выль бур олӧм лӧсьӧдігӧн быд торъя йӧзлы зэв ёна отсасьӧ аслас кывъя гижӧдчукӧр (литература); миян коми литература эз на вермы ёна сӧвмыны революция бӧрын, этшаӧнӧсь на коми гижысьясыс, разі-пели уджалӧны, некод оз отсав, эз на вермы лючки вӧчны ассьыс уджъяссӧ; литературалӧн могъясыс жӧ индӧны — кутшӧмджык колӧ лоны ӧнія литература, кутшӧмджыкӧсь колӧ лоны ӧнія гижысьяслы: гижысьяслы колӧ олӧм вылас да водзӧ мунӧм вылас видзӧдны пролетариат моз, мед гижӧдъясыс отсасисны рабочӧйлы да крестьяналы выль олӧм дорны, выль бур олӧмлань коммунист партия индалӧм серти чорыда тувччавны — та вӧсна, конференция: а) ошкӧ Сыктывдінкарса гижысьясӧс да коми литература йылысь тӧждысьысьясӧс — коми гижысьясӧс котыртны босьтчӧмысь, КАПП лӧсьӧдӧмысь, б) ошкӧ тшӧтш коми гижысь чукӧрлысь ВАПП-ӧ пырӧм.
2) КАПП-лӧн Правленньӧ март тӧлыссянь ӧнӧдз бура унатор нин вӧчӧма — Правленньӧ уджалӧма бура.
3) ВАПП-сянь ыстӧм устав КАПП-лы босьтны ньӧти вежлавтӧг да Мӧскуаын дзикӧдз вынсьӧдӧм бӧрын босьтчыны уджавны сійӧ устав серти.
4) Водзӧ кежлӧ индыны со кутшӧм уджъяс (ортсын):
а) ёнджыка тӧдмавны селькоръяс пиысь да мукӧд гижыштны заводитысь войтыр пиысь выль коми гижысьясӧс да босьтавны найӧс КАПП-ӧ;
б) бурджыка тӧдмӧдны важ коми гижысьясӧс КАПП-ыскӧд да босьтавны найӧс КАПП-ас; коді мыйлакӧ оз пыр ӧні — КАПП-са коми гижысьяслы накӧд ӧтувджык уджавны, вочасӧн старайтчыны найӧс веськӧдны тшӧтш миян туй вылӧ.
в) ёнджыка тӧдмӧдны коми йӧзсӧ — кутшӧм могъяс литература водзын, кутшӧм уджъяс КАПП-лӧн, кутшӧм эм коми гижӧдторъяс, нигаяс; тайӧ позьӧ вӧчны докладъясӧн да сёрниясӧн, коми рытъясӧн, унджык нига лэдзӧмӧн;
г) колӧ ёнджыка матыстны коми крестьяна бердӧ коми нига: висьтавлыны коми йӧзлы нигаыслысь коланлунсӧ, отсавны коми нига лэдзанінлы корсьны сьӧм нигасӧ донтӧммӧдӧм вылӧ, отсавны сылы ёнджыка разӧдны коми нигаяссӧ йӧз пӧвстас.
д) быд ыджыдджык школаын колӧ лӧсьӧдны литература кружокъяс да КАПП-лы отсавны сэн уджсӧ сувтӧдны; сідзжӧ колӧ КАПП-лы отсавны бурджыка сувтӧдны сэтшӧм школаясас литература велӧдан удж;
е) медым регыдджык да бурджыка лӧсьӧдны коми литература кыв, КАПП-лы колӧ бура тшӧтш отсавны Коми му велӧдан чукӧрса литература секциялы — коми кыв велӧдӧмӧн, йӧз пӧвстысь быдсяма сьылан-мойдан-нӧдан-бӧрдан да мукӧдпӧлӧс «кыв» чукӧртӧмӧн, ассянь коми кывсӧ озырмӧдӧмӧн;
ж) бурджыка кӧртасьны (гижасьӧмӧн да мукӧд ногӧн) коми пермяк гижысь чукӧръяскӧд, удмурт (вотяк) да мари (черемис) гижысь чукӧръяскӧд — налы отсавны, налысь отсӧг корны;
5) ас пытшкын (чукӧр пытшкас) индыны со кутшӧм уджъяс:
а) лӧсьӧдавны быд вӧлӧсьтын, эм кӧ 2−3 коми гижысь, КАПП-лысь чукӧрторъяс;
б) лӧсьӧдавны Сыктывдінкарын да обласьт пасьта велӧдчан кружокъяс КАПП-са да мукӧд коми гижысьяслы; правленньӧсянь ыстыны быд кружокӧ программа да индӧдъяс;
в) коді оз вермы волывлыны кружокъяс вылӧ (абу ли мый ли) — на костын лӧсьӧдны торъя программа серти ас велӧдчӧм;
г) лӧсьӧдны журналын (кутшӧм журналын пондас КАПП-ыс печатайтны) велӧдан-индалан юкӧд — сэні тшӧкыдджыка лэдзавны велӧдан-индалан гижӧдторъяс;
д) ӧткӧн-ӧткӧн гижӧм кындзи, коми гижысьяслы велӧдчигъясас да уджалігас тшӧтш видлавны мукӧд пӧлӧс гижанногъяс: кымынкӧ морт ӧтув, котырӧн.
е) медым бурджыка гижны, коланторъяс йылысьджык да, колӧ гижысьяслы став миян олӧмсьыс босьтавны быд коланторсӧ; лыддьыны бура гижны велӧдан нигаяс, босьтавны татчӧс газетъясысь лоӧм-вӧлӧмторъяссӧ (сюжетъяс да темаяс пыдди), бура видзӧдны да кывзыны гӧгӧрбок мый керсьӧ, тӧд вылӧ уськӧдны либӧ йӧзлысь юасьны — кыдзи да мый вӧлі миян гӧгӧр тайӧ 8−9 вонас (олӧм вежсьӧм, белӧйяскӧд тышкасьӧм, олӧм водзӧ мунӧм и с. в.), кывзыны да гартны пель саяд коми йӧзлысь мичаа сёрнитӧмсӧ и с. в.
ж) кутшӧмджык гижӧдторъяс гижны: кутшӧмджык колӧ да кутшӧмджык позьӧ; ӧні миян колӧ нин босьтчывны кузьджык висьтъяс гижавны, миян татшӧм сикас гижӧдторъясыс абукодь на;
з) КАПП-лы колӧ тӧждысьны, медым вӧліны спектак вылын бур коми ворсанторъяс; сэсся колӧ лӧсьӧдны кымынкӧ гижӧдтор коми олӧмысь кинолента вӧчӧм вылӧ;
и) коми гижысьяс чукӧртчылӧм вылын колӧ бурджыка сувтӧдны ассьыныс гижӧдторъяс видлалӧм, ошкӧм-кулитӧм сёрни;
к) таысь кындзи, ёнджыка босьтчывны колӧ гижны газетӧ да журналӧ торъя гижӧдторъяс йылысь да торъя коми гижысьяс удж йылысь;
6) Коми гижӧдторъяс да КАПП удж йылысь печатайтӧм:
а) газетӧ туян гижӧдторъяслы, КАПП удж йылысь гижӧдторъяс и с. в. — корны водзӧ кежлӧ быд вежонын кык лист бок;
б) коми кыв да литература тӧдмалан-велӧдан удж йылысь, коми йӧз пӧвстысь чукӧртӧм быдсяма «сьылан-бӧрдан-нӧдан... кыв», торъя коми гижысьяслысь олӧм-вылӧм-уджалӧм йылысь да мукӧдтор йылысь печатайтӧм вылӧ — корны восьтыны бӧр литература юкӧд «Коми му» журналын;
в) мед лючкиджыка котыртны коми гижысьясӧс, мед бурджыка петкӧдлыны налысь уджалӧмсӧ, мед водзӧ йӧткыны коми литература сӧвмӧмсӧ — корны Обисполкомлысь сьӧм да таво арсянь босьтчыны лэдзны быд тӧлысьын коми литература журнал;
г) корны Обисполкомлысь сьӧм коми литература паськӧдӧм вылӧ да сійӧс донтӧммӧдӧм вылӧ — медым коми нига лэдзанін вермис унджык да донтӧгджык лэдзны коми гижысьяслысь ыджыд гижӧдторъяссӧ.
