МЕДВОДДЗА ВОСЬКОВЪЯС

Ставыс гӧгӧрвоӧны тайӧ кык кывсӧ — «ӧтувтчӧмын вын». Кытчӧ кӧть он кутчысь, кутшӧм удж кӧть он понды керны — быдлаын ковмӧ ӧтувтчӧм, быд удж вылын колӧ мӧда-мӧдлы отсасьӧм. Уджсьыд некутшӧм сер оз пет, кодыр ӧтик ёрт мунӧ (кыскӧ) ӧтарӧ, а мӧд — мӧдарӧ.

Коми литература, коми кывйыс ставнас воысь воӧ мичмӧ, паськалӧ, крепаммӧ. Революция садьмӧдіс коми йӧзӧс. Революция на пӧвстысь петкӧдіс-кыпӧдіс уна сюсь, вежӧра йӧзӧс. Революция выль туй кузьта мӧдӧдіс став коми йӧзӧс, дзикӧдз вежис налысь оласногсӧ. Революция чужтіс коми гижысьясӧс.

Ставыслы колӧ сетны туйдӧдъяс. Миян удж: отсавны кыпӧдчыны выль чужысь коми гижысьяслы, ӧтувтны найӧс, ӧтувтны коми литературасӧ. Дугдывтӧг чуксавны коми йӧзӧс, садьмӧдны найӧс, чуйдыны котыра олӧмлань — со мый сулалӧ миян гижысьяс водзын.

Сыктывдінкарса коми гижысьяс сьӧлӧмсяньыс кутчысисны тайӧ удж бердӧ. Найӧ таво лым сылігас (Коми гижысь чукӧрыд, майбырӧй, оз сыв — паськалӧ) ӧтувтчисны, панісны КАПП. 12 мортсянь (пансигас пырисны сӧмын 12 морт) КАПП-ыд вель уна нин содіс. Ӧні кежлӧ 30 морт ӧтувтчӧмаӧсь, 30 морт олӧны ӧтик мӧвпалӧмӧн, ӧтик кӧлӧмӧн. 30 морт пиысь, кыдзи юр вемсянь сӧнъяс, 9 морт паськӧдчӧмась кытчӧсюрӧ, уджалӧны сиктъясын.

Ӧні КАПП-лӧн муніс медводдза конференция. Коми гижысьяс чукӧртчылісны Изьвасянь, Эжвасянь, Сыктывсянь. Чукӧртчисны вӧчӧм уджныс вылӧ видзӧдлыны, паськӧдны водзӧ мунан ордымсӧ.

Сьӧкыд вӧліс первойсянь... Вӧр пиын коми гижысьяс ӧтувтчисны... джуджыд вӧр пиын... Югыдыс эз тыдав... Отсӧгыс — сьӧлӧмсӧ кыпӧдӧмыс весиг эз вӧв... Гӧгӧрбок судзсьытӧм, гӧльлунным торкаліс уджавнысӧ. Отсӧгтӧг, куш кинад нӧ кытчӧ кутчысян?

Крепыд сьӧлӧма, сюсь коми гижысьяс повзьытӧг, эновтчытӧг мунӧны водзӧ. Ньӧжйӧник, вӧрзьывтӧм вылӧ тэчӧны выль керкалысь увтассӧ — чуксалӧны йӧзӧс литература пыр выль олӧмлань.

Лэдзӧма асланым вынӧн торъя нига, дас витӧд лист бок (водзӧ кутамӧ перйыны и вермамӧ перйыныс уна лист бока аслыным журнал), талун лэдзимӧ ассьыным уджнымӧс.

Тайӧ сӧмын заводитчӧмыс. Тайӧ сӧмын медводдза воськовъяс коми гижысьяслӧн. Ӧні ми ӧтувъяӧсь, ӧні миянӧс воддза моз кедзовтны некод оз вермы.

КАПП сулалӧ зумыд туй вылын. КАПП веськыда мунӧ да нуӧдӧ ас бӧрся став йӧзсӧ югыдлань. КАПП-лысь увтассӧ вӧрзьӧдны некод оз вермы.

Конференция пасъяліс водзӧ мунан туйсӧ коми гижысьяслы, ставныслы индіс уджсӧ. Ӧні кокньыдджык лоӧ вӧр пиӧд тувччавны, ӧні вӧр йывті тыдовтчис кыпалысь шондіыслӧн югӧрыс. Збойджыка, кежлавтӧг тувччаламӧ водзӧ!.