МӦДА-МӦДЛЫ ОТСАСЬӦМӦН КЫПӦДӦНЫ ОВМӦС

Ӧнӧдз на крестьяна пӧвстысь кывлан сёрнияс: сиктъяс пӧ вердӧны карӧс. Мӧд ног кӧ шуны: крестьяна вердӧны рабочӧйӧс. Тайӧ сідзи и эм. Сӧмын колӧ гӧгӧрбок мӧвпыштлыны. Крестьянин сетӧ няньсӧ карӧ — рабочӧйлы. Мӧдарӧ кӧ видзӧдлам: вермас-ӧ оз крестьяниныс сетны няньсӧ карас — рабочӧйяс отсӧгтӧгыс? Дерт, оз вермы. Видз-му уджалан кӧлуйтӧгыд, кодӧс рабочӧйыд сетӧ крестьянинлы, няньтӧ, ме чайта, ёна он перйы, он вӧдит. Унаӧн мӧвпалӧны сідз — государствоыслӧн медыджыд доходыс чукӧрмӧ налогъясысь — коді босьтсьӧ крестьянасянь. Ӧні видзӧдлам, уна-ӧ и кытысьджык босьтӧ государствоыс доходсӧ.

Босьтам 1925−26 вося бюджет (став приход-рӧскод арталӧм) государстволысь. Воддза 1924−25 воӧ государство босьтліс крестьянасянь сельскокӧзяйственнӧй налог 335 миллион шайт. 1925−26 воӧ налогыс чиніс 234 миллион шайтӧдз. Сідзкӧ нӧ, чинны колі и государствоса бюджетыслы, а сійӧ содіс и содіс прамӧя. 1924−25 воӧ бюджетын сьӧмыс вӧліс 2 миллиард и 875 миллион шайт, а 1925−26 воын лоис 4 миллиард шайт саяс. Унджык сьӧмыс мунӧ промышленносьт и сельскӧй кӧзяйство кыпӧдӧм вылӧ. Налогыс крестьянасянь чиніс, а бюджетыс содіс. Кысь нӧ государствоыслы воӧ доходыс? Мыйла нӧ налогъяс чинӧ, а бюджетыс содӧ?.

Со мыйла. Государство ёна отсалӧ-кыпӧдӧ пытшкӧсса овмӧс. Ёнмӧны пабрик-заводъяс, содӧ мупытшкӧсса озырлун перйӧм, паськалӧ государствопытшкӧсса тӧргуйтӧм и сідз водзӧ. Ставсяньыс сэтысь локтӧ государствоыслы доход. Налогъяссянь локтӧ доходыс 1 миллиард и 880 миллион шайт (татчӧ пырӧ ставпӧлӧс налогыс: тӧргӧвӧйяссянь, служащӧйяссянь и с. в.), а став овмӧссьыс-кӧзяйствосьыс государствоыс доходсӧ босьтӧ 1 миллиард и 960 миллион шайт.

Став налогӧвӧй доход пиас (1,880 миллион шайт) сельскокӧзяйственнӧй налогыс сӧмын 234 миллион шайт (сӧмын кӧкъямысӧд пайыс.) Став государственнӧй бюджетас доходыс — сельскокӧзяйственнӧй налог помысь — сӧмын дас сизимӧд пайыс. Сэсся оз ков вунӧдны, мый сельскокӧзяйственнӧй налогсьыс 100 миллион шайт вӧлі кольӧма вӧлӧсьтъясӧ, коді ставнас муніс крестьяналысь овмӧс-культура кыпӧдӧм вылӧ.

Ӧні ми аддзам, уна-ӧ государствоыс босьтӧ доходсӧ крестьянасянь налогӧн и уна-ӧ мукӧдлаысь. Сідзкӧ нӧ, оз позь шуны, сиктъяс пӧ вердӧны карӧс, рабочӧйяс пӧ олӧны крестьяна пельпом вылын.

Сӧветскӧй государствоын рабочӧй да крестьяна ӧткодя мынтӧны налогъяссӧ, ӧткодя асланыс уджӧн содтӧны государствоыслысь доходсӧ, ӧтвылысь кыпӧдӧны став овмӧссӧ.

Сӧмын ӧтувъя уджӧн, мӧда-мӧдлы отсасьӧмӧн рабочӧй-крестьяна кыпӧдӧны Сӧветскӧй государстволысь овмӧссӧ, культурасӧ.