ВЫЛЬ ЗАКОН ОШКӦНЫ

Ме кыла — гӧлиник да шӧркост олысь крестьяна выль закон с.-к. вот йылысь шуӧны, тайӧ пӧ лоӧ самӧй бур да самӧй веськыд закон: кор пӧ босьтсьӧ унджык сылысь кодлӧн эм да коді унджык босьтӧ доход. Дерт, бурджыка олысь крестьяналы тайӧ сьӧлӧм вылас озджык во.

Кор ещӧ оз вӧлі кывсьы выль закон йылысь, уна сапожник, мельник, кузнеч да мукӧд ошйысьывлісны, мый ӧти лунӧн пӧ нажӧвитчам 10 да 15 шайтӧдз. Ӧні асьныс жӧ шуӧны, оз позь пӧ 1 тӧлысьнас нажӧвитнысӧ сы мындасӧ.

Крестьяна сералӧны на вылӧ — ті нӧ тай энӧ мынтывлӧй налогсӧ, кыдзи мынтӧны карса ремесленникъяс, а донсӧ пӧ тай миян выльысь босьтлінныд ыджыдӧс.

Крестьяна ӧні полӧны, вот пӧ ӧні найӧ лӧгасясны да пондасны миянлысь босьтны донаджык.

Оз ло сідз. Ежели кутасны найӧ дзескӧдны да дон лэптасны, позяс ӧд на вылӧ лӧсьӧдны крестьянскӧй контроль — либӧ мастерскӧйтӧ тупкы, либӧ кооперативӧ ассьыд уджтӧ сдайт, ежели тэныд налогыд сьӧкыд. Кутан овны жалӧванньӧ вылӧ, кыдзи олӧны мукӧд спецъяс.

А. З.