ОТСАЛАМ ЕЩӦ АНГЛИЯСА РАБОЧӦЙЯСЛЫ

Англияса из шом перйысь рабочӧйяс эз дугдыны косясьны капиталистъяскӧд. Нёльӧд тӧлысь нин найӧ оз петны удж вылӧ капиталистъяслы, бастуйтӧны. Татшӧм ыджыд водзсасьӧмыс рабочӧйяслӧн капиталистъяскӧд зэв шоча овлывлӧ. Капиталистъяс правительствоыскӧд ӧтвылысь зільӧны англияса из шом перйысь рабочӧйясӧс жугӧдны.

Англияса бастуйтысь рабочӧйяслы овны вывті сьӧкыд. Налы англияса профсоюзъяслӧн Генеральнӧй Сӧветыс оз отсав. Бастуйтысь рабочӧйяс олӧны ӧні сӧмын мукӧд государствоса рабочӧйяс отсалӧмӧн, медсясӧ нин СССР-са уджалысь йӧз отсалӧмӧн. Сӧмын тайӧ отсалӧмыс эз на эшты. Отсӧгсӧ дугдывтӧг колӧ нуӧдны водзӧ. Тшыг бастуйтысь рабочӧйяс, бабаясыс да налӧн челядьыс виччысьӧны миянсянь отсӧг.

Профинтернлӧн Исполнительнӧй бюроыс ӧні чукӧстчис став уджалысь йӧз дінӧ отсавны англияса бастуйтысь рабочӧйяслы коді мыйӧн вермас.

Коми обласьтын уджалысь йӧз отсалісны нин англияса из шом перйысь рабочӧйяслы, дай водзӧ на ми чайтам, кутасны отсавны налы. Из шом перйысь рабочӧйяс виччысьӧны миянсянь отсӧгсӧ. Ӧні кӧ ми сетам бур отсӧг, англияса рабочӧйяс сійӧ некор оз вунӧдны, водзӧ вылӧ отсаласны миянлы вермасьны капиталистъяскӧд.

Англияса профсоюзъяслӧн Генеральнӧй Сӧветыс да Ставмувывса горнорабочӧйяс Союзлӧн Исполкомыс эновтісны англияса из шом перйысь рабочӧйясӧс ас выланыс, нинӧмӧн дзик оз отсавны налы, весиг паныд на мунӧны.

Сӧмын англияса из шом перйысь рабочӧйяс повтӧг, чорыда, ӧтвылысь сулалӧны, оз кӧсйыны сетчыны капиталистъяслы. Неважӧн кутчысьлісны «миритны» англияса попъяс рабочӧйясӧс капиталистъяскӧд. Найӧ вӧлі тшӧктӧны капиталистъяслы кутшӧмсюрӧ кокньӧдъяс сетны рабочӧйяслы, а рабочӧйяссӧ вӧлі тшӧктӧны ичӧтика лэдзыштны ассьыныс корӧмъяссӧ, сӧгласитчыны уджавны, ичӧтика кӧ капиталистъясыс кокньӧдыштасны. Та йылысь гӧлӧсуйтісны став англияса из шом перйысь рабочӧйяс пиас, сӧмын найӧ эз сӧгласитчыны попъяс ног вӧчны.