ТӦВАР ДОНТӦММӦМ ЙЫЛЫСЬ

Сиктъясын унаысь юасьӧны: дыр-ӧ нӧ пӧ тӧварлӧн доныс оз усь. Пыр пӧ висьталӧны тӧвар дон лэччӧм йылысь, а миян пӧ тӧвар дон пыр содӧ.

Вай видзӧдлам, сідз абу. Кык во сайын самӧй омӧлик ситечлӧн доныс вӧлі 50 ур аршын, а ӧні 24 ур. Матерйӧяс вӧлі чӧлкӧвӧя аршын — ӧні 50 ур. Сакар пунт вӧлі чӧлкӧвӧй — ӧні 34 ур. Сідз жӧ ёна доныс усис и мукӧд тӧварлӧн. Тайӧ босьтӧма карын вузалан тӧварлысь донъяссӧ. Миян тӧвар доныд мукӧд губерняяс серти лададжык. Ӧні мукӧд губерняясын донъясыс заводитліс ёна кыптыны, сӧмын правительствоыс босьтчис чинтыны да ньӧжйӧникӧн дзикӧдз чинтас.

Овмӧсыд воысь воӧ пыр кыпалӧ. Тӧварыд кутіс ковмыны унджык нин. Мукӧд тӧваръяссӧ пабрик-заводъясыд унджык нин важ дорысь лэдзӧны, сӧмын пыр на оз тырмы. Код тӧвар оз тырмы, сы вылӧ и доныс содӧ.

Сэсся миян кооперативъясыд оз на кужны тӧварсӧ донтӧммӧдныс. Найӧ кӧсйӧны босьтны уна барыш, а видзӧдлан кӧ, унджыкысьсӧ лоӧ убытка. Кооперативса шленъясыс лавкасӧ оз лыддьыны ассьыс пыдди, видзӧдӧны пыр кыдзкӧ сійӧс ылӧдны. Уджӧн босьтасясны да сэсся оз мынтыны зэв дыр, а мукӧдыс и некор. Паевӧй взносъяссӧ оз ставнас сетны. Мукӧдлаас сідзжӧ бӧрйӧны омӧль йӧзӧс лавкаса правленньӧас. Оз индавны правленньӧыслы, кыдзи колӧ уджавны, кутшӧм тӧвар колӧ вайны.

Колӧ ставнымлы кооперативъястӧ ёнмӧдны: уджйӧзъяс мынтыны срокӧн, взнос ставнас сетны, лавкаса правленньӧӧ бӧрйыны бурджык йӧзӧс, ёнджыка налы уджалігас индавны.

Выльгортса.