ПИЛСУДСКӦЙ СУЛАЛӦ КАПИТАЛИСТЪЯС ДОР
Таво май тӧлысьын Польшаын генерал Пилсудскӧй ас дор сулалысь войска отсалӧмӧн шыбитіс важ правительствосӧ Польшасьыс. Унджык Польшаса йӧзыс важ моз на лыддьӧны Пилсудскӧйсӧ революция дор сулалысь мортӧн. Сы вӧсна важ польшаса правительствосӧ шыбитігӧн Пилсудскӧйлы отсалісны польшаса социалистическӧй партия кындзи весиг ӧткымын революция дор сулалысь рабочӧйяс.
Сӧмын Пилсудскӧйӧн власьтсӧ босьтӧм бӧрын найӧ казялісны, мый Пилсудскӧйыс дорйӧ гырысь капиталистъясӧс. Важ правительство шыбитӧм бӧрын медвойдӧр сійӧ кутіс корны ыджыдджык власьт президентыслы да выль правительствоыслы сетны унджык права. Ӧні власьтсӧ президентыслы эз на содтыны да, весиг сійӧ президентас эз пуксьы. Ӧні президентас бӧрйисны сылысь другсӧ — профессор Мосьцицкӧйӧс. Ачыс Пилсудскӧйыс пуксис военнӧй министрӧ.
Польшаса парламент Пилсудскӧй корӧм серти сетіс польшаса правительствоыслы кутшӧмсюрӧ права (эз эськӧ ставсӧ, мый вӧлі корӧ Пилсудскӧйыс). Парламентыс сетіс правительствоыслы права парламентыслысь юасьтӧг лэдзавны выль законъяс рабочӧйяс йылысь. Польшаса рабочӧйяс дыр косясьӧмӧн вермылісны лӧсьӧдны аслыныс 8 часа уджалан лун, асьсӧ страхуйтӧм да ещӧ мыйсюрӧ. Ӧні парламентыд правительствоыдлы выль законъястӧ лэдзны права сетіс — да рабочӧйясыдлысь сійӧ кокньӧдъяссӧ бӧр ставсӧ босьталасны. Польшаса рабочӧйяслы бара ёна ковмас водзсасьны капиталистъяскӧд.
Ӧні польшаса правительство политикасӧ кутіс нуӧдны мукӧд государствояскӧд Англия индалӧм серти. Бӧръя кадас сійӧ ёна кутіс кышасьны Литва вылӧ. Литва гранича дінӧ ӧні Польшаса правительство гусьӧн чукӧртӧ зэв уна войска, оруддьӧяс да мукӧдтор. Сійӧ быд ногыс зіля лӧсьӧдчӧ Литвакӧд война кежлӧ. Тайӧ войнасӧ панӧны со мый вӧсна. Литваыс олӧ Сӧвет республикакӧд зэв бура, лӧсьыда миянкӧд волысьӧ да сійӧ вывті оз сьӧлӧм вылас во Польшаыслы да сы дор сулалысь Англиялы.
Сэсся Польшаыс быд ног зільӧ торкны гарантийнӧй договор вӧчӧмысь (мӧда-мӧд вылӧ войнаӧн не мунӧм йылысь да врагъяслы не отсалӧм йылысь) Сӧвет республика да Прибалтийскӧй государствояс кост (Латвия, Эстония да Финляндия кост).
Тайӧ став сертиыс позьӧ нин аддзыны, мый Пилсудскӧйӧн Польшаын власьт босьтӧм бӧрын ёнмисны капиталистъяс, революциялы паныд мунысь йӧз. Рабочӧйясӧс да крестьянаӧс найӧ ёна на заводитласны жмитны.
