ӦНІЯ УДЖ СИКТСА КОММУНИСТЪЯСЛӦН

Миян овмӧс лунысь-лун кыпалӧ. Паськалӧ видз-му уджалӧм, ёнмӧны пабрик-заводъяс. Видз-му уджалӧм тавося во вылӧ кыпаліс 88 прӧчентӧдз, пабрик-заводъяслӧн став кӧлуй-тӧвар вӧчӧмыс — 95 прӧчентӧдз война заводитчан во серти.

Сӧвет правительство пуктӧ став вынсӧ овмӧс кыпӧдӧм вылӧ. Сійӧ кыдз вермӧ паськӧдӧ-выльмӧдӧ став пабрик-заводсӧ. Та вылӧ колӧ сьӧм. Сьӧмтӧг, дерт, он вермы дӧмны важ киссьӧминъяссӧ (местаяссӧ).

Государстволӧн быдлаӧ сьӧмыс оз судзсьы. Лишнӧй сьӧм лэдзны оз позь — вермас усьны сьӧмыслӧн доныс. Мукӧд государствоясысь водзӧса отсӧг (заём вылӧ) виччысьӧм вылӧ надея абу. Сідзкӧ кӧ, ковмас корсьны мӧд туй.

Коммунист партия та кузя шуис: сьӧм колӧ чӧжны асланым. Кытчӧсюрӧ ковтӧм рӧскодъяс колӧ дзикӧдз бырӧдны. Рӧскодуйтны ёна мӧвпалӧмӧн-думайтӧмӧн — сӧмын медся коланторъяс вылӧ. Быд ур йылысь рӧскодуйттӧдз мӧвпыштны — ёна-ӧ колантор вылӧ сійӧ мунӧ, уна-ӧ ваяс пӧльзасӧ.

Ӧні коммунист партия туйдӧм серти быдлаын нуӧдӧны зэв ыджыд удж ковтӧм рӧскодъяс бырӧдӧм кузя. Каръясын сиктъяс дорысь водзджык кутчысисны тайӧ удж бердӧ.

Вӧлӧсьтъясын тайӧ удж дінӧ кутчысисны сёрӧнджык. Ковтӧм рӧскодъяс бырӧдӧм уджӧ колӧ бура кутчысьны вӧлӧсьтувса коммунист партия ячейкаяслы. На вылӧ пуктыссьӧ ыджыд надея.

Медым бура нуӧдны тайӧ удж, колӧ ёна тӧдмавны-велӧдны партиялысь туйдӧмъяссӧ. Тӧдмавны, кытысьджык кутшӧм ногӧн позяс чинтыны рӧскодъяс. Быд коммунистлы, учрежденньӧын уджалысьлы, быд вежӧра мортлы ковмас сьӧлӧмсяньыс, чорыда кутчысьны ковтӧм рӧскодъяс чинтӧм удж бердӧ.

Босьтам вӧлӧсьтувса исполкомӧс. Сэтӧні ковтӧм рӧскодыд, омӧля уджалӧмыд, дерт, вермас лоны. Ячейкаса чукӧртчылӧм вылын волисполкомса удж йылысь колӧ пуктыны доклад. Доклад кузя ёна тӧдмавны сылысь уджсӧ, сёрнитны, индыны туйсӧ, медым лёкторъяссӧ бырӧдісны.

Кооперативъясыд сідзжӧ ёна на кытчӧсюрӧ сьӧмнысӧ шыблалӧны. Уналаын тӧварсӧ заптӧны омӧль туйясӧн (рӧспута дырйи), чередиттӧм вӧсна тшыкӧдӧны, киськалӧны, чиркйӧны. Овлӧ и сідз, мый лавкаын уджалысьясыс ассьыныс зепнысӧ тыртӧны лавкаса сьӧмнас. Ревизионнӧй комиссияяс видзӧдӧны чунь кост пырыс. Уджйӧзнад йӧзыдлы сеталасны, а бӧрыннас чукӧртныс оз вермыны. Мукӧд лавкаясас весиг тэчсян пайяссӧ оз чукӧртны.

Партийнӧй ячейкаяслы ковмас чорыда кутчысьны индавны кооперативса удж бурмӧдан ногъяссӧ. Дерт, ковмас ёна отсавны быд кооперативса шленлӧн. Кооперативыс — асланыс шленъясыслӧн. Кымын ёнджыка пондас тӧждысьны быд шлен, сымын регыдӧн кыпалас-ёнмас кооператив, сымын уна лоӧ донтӧм да крестьяналы колан тӧвар.

Мукӧд учрежденньӧясын уджалӧны коммунистъяс. Ячейкаса чукӧртчылӧм вылын шочиника колӧ кывзыны найӧ уджалӧм йылысь. Омӧля уджалӧмысь коммунистъяс мыжаӧсь став йӧз водзас, партия водзас. Налы (коммунистъясыслы) эбӧссӧ видзтӧг ковмас медся ёна кутчысьны бырӧдны ковтӧм рӧскодъяс, кыпӧдны учрежденньӧяссьыс уджсӧ.

Татӧні став йывсьыс висьтавны, дерт, он слӧймы. Партийнӧй ячейкаяслы вӧлӧсьтъясын аслыныс ковмас тӧдмавны став олӧмсӧ, гӧгӧрбок видлавны. Став йӧзсӧ чуйдыны, медым отсаласны бырӧдны ковтӧм рӧскодъяс.

Сӧмын став йӧзыскӧд ӧтвылысь, сьӧлӧмсянь удж дінӧ кутчысьӧмӧн вермам бырӧдны ковтӧм рӧскодъяс. Ӧтиклаысь ур, мӧдлаысь шайт — Республика пасьталаыс чӧжсяс унакодь. Идӧра олӧмӧн кыпӧдам Республикалысь овмӧс, паськӧдам социализм стрӧитан удж.