ОЗ КОВ НЯРГЫНЫ

Сӧмын на неважӧн ӧтувтчим, сӧмын на босьтчам уджавны, а кодсюрӧлӧн пондӧма нин юр нюкыльтчыны, кияс ӧшӧдчыны. Кодсюрӧ няргӧны: «Нинӧм тай оз артмы, важ гижысьяс омӧля кылӧны томъясӧс — оз отсавны, томъяс куш ас выннас оз вермыны кыпӧдчыныс».

Гижны, дерт, окота кындзи колӧ кужӧм. Кужӧмыс жӧ уналӧн абу, сійӧн и нинӧм оз артмы, сійӧн и оз печатайтны налысь. Миян колӧ ёна велӧдчыны, колӧ сюсьлуннымӧс паськӧдны, видзӧдны сюся олӧм вылас, мед гижӧдъясным оз лоны тыртӧмӧсь. Колӧ велӧдчыны гижны мичаа, шыльыда.

Важ гижысьяс ёна велӧдны оз вермыны некыдз. Миян абу на весиг асланым журнал — гижӧд пыр велӧдны огӧ вермӧй. (Ӧти лист бокад уна он гиж). Ветлыны сиктъясӧ нинӧм вылӧ, сьӧмным абу. Лоӧ том гижысьяслы аслыныс босьтчыны, ас вынӧн туй писькӧдны. Кӧні эм кымынкӧ гижысь, сэн позьӧ котыртчыны ӧтувйӧн велӧдчӧм вылӧ. КАПП-лӧн правленньӧыс сэтшӧм чукӧръясыслы тӧв кежлӧ ыстас программаяс, индас туй, веськӧдас.

Кыптысь-гижысь коми войтырлы колӧ кыссьыны Сыктывдінкарӧ Сӧвет партия уджӧ велӧданінӧ (Совпартшколаӧ). Сэні паськӧдасны сюсьлун, велӧдасны гижны нарошнӧ пуктӧм йӧз.

Бура гижысь комилӧн этша на, омӧля на петӧ литература, абу некутшӧм коми журнал, но олӧмыс мунӧ водзӧ, выль гижысьяс кыптӧны, накӧд тшӧтш кыптӧ литература. Оз ков сӧмын няргыны, а колӧ ӧтув, сувтлытӧг, сьӧлӧмысь, повтӧг водзӧ пыр мунны.