КУТШӦМ КОКНЬӦДЪЯС СЕТСЬӦ КРЕСТЬЯНАЛЫ ЗЕМЛЕУСТРОЙСТВО НУӦДІГӦН

Колян 1925ʼ воӧ, май тӧлысьын, миян Сӧвет власьт шуис, гӧль крестьяналы пӧ землеустройство нуӧдігӧн колӧ отсавны, землеустройство вылӧ дон мынтӧмысь пӧ найӧс колӧ мездыны.

Тайӧ шуӧм серти, гӧль крестьянаӧс землеустройствоысь дон мынтӧмысь мездӧм вылӧ, Сӧвет власьт 1925ʼ воӧ лэдзис 3.000.000 шайт сьӧм да шуис: гӧль крестьяналысь, кӧні землеустройствосӧ заводитӧмаӧсь нуӧдны май тӧлысь бӧрын, дон землеустройство нуӧдӧмысь не перйыны. Кӧні землеустройство заводитӧмаӧсь нуӧдны 1925ʼ во май тӧлысьӧдз, сійӧ уджъяс кузя дон мынтӧмысь некод оз мездыссьы.

Тайӧ 3.000.000 шайт сьӧм став Союз пасьта юклӧм мысти миян Коми обласьтӧ воис 2.000 шайт, гӧль крестьянаӧс землеустройство нуӧдӧм пыдди дон мынтӧмысь мездӧм вылӧ. Тайӧ 2.000 шайтсӧ Обисполком шуӧм серти юкӧма со кыдзи:

1) Кӧдзвывса земельнӧй обществолы — 1230 шайт;

2) Чит сиктлы Выльгортса Зем. Обществолы — 100 шайт.

3) Кужса нюр косьтан тӧвариществолы — 35 шайт;

4) Сереговса нюр косьтан тӧвариществолы — 25 шайт;

5) Тыдорса нюр косьтан тӧвариществолы — 12 шайт;

6) Аквадса с. х. кооперативнӧй тӧвариществолы — 13 шайт;

7) Пальтыдорса с. х. коопер. тӧвариществолы — 15 шайт;

8) Леткаса пӧчинокъяслы — 110 (Лунвожса пӧчиноклы — 10 шайт; Пӧльячим шорса пӧчиноклы — 5 шайт; Кузьнӧрысса пӧчиноклы — 10 шайт; Иванчик пӧчиноклы — 15 шайт; Галашевскӧй пӧчиноклы — 30 шайт; Ердаковскӧй пӧчиноклы — 10 шайт; Богомоловскӧй пӧчиноклы — 30 шайт).

9) Инструментъяс ньӧбны — 460 шайт (теодолит вылӧ).

Тайӧ сьӧмсӧ вӧлӧсьтувса исполкомъяслы, мӧда-мӧдлы отсасян комитетъяскӧд ӧтвылысь, вӧлі тшӧктӧма юклыны гӧль крестьяна кост да налысь землеустройство нуӧдӧмысь дон не перйыны. Тайӧ сьӧмыс гӧль крестьянаыслы оз сетсьы кианыс, а сӧмын найӧ мездыссьӧны землеустройство вылӧ дон мынтӧмысь.

Кымын крестьянинӧс мездӧма землеустройство вылӧ дон мынтӧмысь, вӧлӧсьтувса исполкомъяс ӧнӧдз на эз сетны сведенньӧяс. Кымын кӧзяйство мездӧма, ми огӧ вермӧ тӧдны.

Таво 1926ʼ воын миян Коми обласьтӧ Видз-му Комиссариат (Наркомзем) госбюджетысь лэдзӧ сьӧм квайт землемерлы жалӧванньӧ мынтыны, кодъяс гӧль крестьяна му-видз вылын землеустройство нуӧдӧны. Кымын гӧль крестьяна кӧзяйство лоӧ таво мездӧма дон мынтӧмысь, дзик ог на тӧдӧй. Став сьӧмсӧ таво гӧль крестьянаӧс землеустройство вылӧ дон мынтӧмысь мездӧм вылӧ лэдзӧма 9 095 шайт. Тайӧ сьӧм вылас таво позьӧ дзикӧдз мездыны землеустройство вылӧ дон мынтӧмысь 350–400 кымын гӧль крестьяна кӧзяйство.

Таысь ӧтдор, землеустройство нуӧдны Обисполком лэдзис сьӧм — вӧрӧ выль местаӧ овмӧдчыны мунысьяслы местаяс вундалӧм вылӧ — 8000 шайт, да гӧль крестьянаӧс землеустройствоысь дон мынтӧмысь мездӧм вылӧ — 3400 шайт. (Тайӧ 3400 шайтсӧ Кӧдзвыв вӧлӧсьтӧ). Колӧ шуны, мый тайӧ таво ыджыд отсӧг гӧль крестьяналы.

Шӧркоддьӧма да бурджыка олысь крестьянаяслы, абу кӧ налӧн кианыс сьӧмыс пырысь-пыр мынтысьны, Сӧвет власьт землеустройство вылӧ дон мынтыны сетлӧ уджӧн (кредит) Сельскокӧзяйственнӧй банк пыр. Уджӧн сетсьӧ ӧтик восянь куим воӧдз.

Куклин С. Д.