МЫЙ НӦ КОЛӦ?

Важӧн нин ме видзӧда газет лыддьысьяс вылӧ, а мукӧддырйи шензьывлакодь на вылӧ, ставыс ӧтмоза лыддьӧ да. Босьтам кӧть Сыктывдінкарса войтырӧс, кӧть сиктса войтырӧс — дзик ставыс ӧткодьӧсь.

Унаысь мӧвпыштлі и сэтшӧмторъяс: босьтӧма «Коми сикт» либӧ «Югыд туй», а лыддьысьысьяслӧн, тыдалӧ, синмыс пемыд на. Неграмотнӧй, а нӧшта колӧ йӧз моз жӧ газетасьны.

Терпитан-терпитан, да ӧд коркӧ воас жӧ и пом.

Ӧтчыд пукалӧ пызан сайын Пиля Петыр (Кулӧмдінысь) да зэв зіля лыддьӧ газеттӧ гугсяньыс.

— Мый нӧ, мися, тэ керан, — юала ме сылысь.

— Газет, шуӧ, лыддя.

— Бӧрӧн кутан да, — бара ме сэтчӧ шуа.

— Ме пӧ век тадзи лыддьывла.

Вӧлисти ме гӧгӧрвои сылысь думсӧ. Вӧлӧмкӧ, сійӧ пыр заводитӧ лыддьынытӧ нёльӧд лист боксяньыс. Медся ёна сійӧс кыскӧ посньыдик заметкаяс да мукӧд пӧлӧс статьяяс, кодӧс гижӧма «Коми муын» юр улӧ. Мукӧд вӧлӧсьтъясын сідз жӧ лыддьӧны. Дивӧыд кутӧ, быттьӧ став газет лыддьысьыс та йылысь тӧлкуйтӧмаӧсь водзвыв (кодъяслысь та бӧрын аддзывлі сэтшӧм лыддьӧмтӧ, дерт, татчӧ пасъявныд ставсӧ ог вермы).

Ӧтчыд сідзжӧ асланым учрежденньӧын служитысь нывбаба газет вайӧм бӧрын зэв горша босьтіс «Югыд туй» да заводитіс кырссьыны нёльӧд лист боксяньыс. Ме сӧмын нюммуні сы вылӧ да, мед оз казяв, босьті перӧ-ручка да зэв зіля куті гижны, быттьӧ немтор ог и тӧд.

Мый нӧ тайӧ висьталӧ.

Ӧтик-кӧ, став уджалысь йӧзыс, рабочӧй и крестьяна, газет пыр дивитӧны лёка олысь да лёка уджалысь войтырӧс да шогсьӧны ӧтик шогӧн омӧля удж нуӧдӧмъясыс вылӧ, удж нуӧдан ногъяссӧ омӧльтӧмыс вӧсна. Мӧд-кӧ, ӧти сьӧлӧмӧн тэчӧны выль олӧм, жугӧдӧны став пежторъяссӧ, тэчӧны газет пыр выль ыджыд социалистическӧй зданньӧ. Ставыс ӧтмоза тільсьӧны да мырсьӧны ас рабочӧй да крестьяна государствоын бура да шыльыда удж нуӧдан ногъяссӧ лӧсьӧдӧм могысь. Ӧти сьӧлӧмӧн жӧ радлӧны быдсяма бурторъяс лӧсьӧдӧм вылӧ да бура удж нуӧдӧмъяс вылӧ.

Коми Мишӧ.